Qyzylordada sáýlet-qurylys salasyndaǵy zańnama talaptaryn buzǵandarǵa 127 mln teńge aıyppul salyndy
QYZYLORDA. KAZINFORM — Bıyl 11 aıda Qyzylorda oblysynyń ortalyǵy men aýdan aýmaqtarynda 555 nysanǵa monıtorıng júrgizildi.
Qyzylorda oblysynyń memlekettik sáýlet-qurylys baqylaý basqarmasy monıtorıng qorytyndysyn jarııalady.
— Sáýlet-qurylys salasyndaǵy zańnama talaptaryn buzǵandarǵa qatysty 525 ákimshilik is qozǵalyp, olarǵa 127 mln teńge aıyppul salyndy. Bul kórsetkish ótken jyldyń 11 aıymen salystyrǵanda 3 ese kóp, — dedi basqarma basshysynyń orynbasary Mádı Álip.
Osy ýaqyt ishinde atalǵan vedomstvoǵa jeke jáne zańdy tulǵalardan 893 ótinish túsken. Sonyń 798-i boıynsha zańnama talaptaryna sáıkes tıisti sharalar qabyldanyp, jaýap berildi. 92 ótinish qaralý rettiligimen tıisti organdarǵa joldansa, 3 ótinish qaralyp jatyr. Ótinishterdi qaraý tártibi men merzimderin buzý derekteri tirkelmedi.
Tekserý nátıjesinde zańbuzýshylyqtar anyqtalyp, birqatar zańsyz qurylys nysanynyń ıelerine aıyppul salyndy.
— Oblys ortalyǵyndaǵy «Arnaý Palas» meıramhanasynyń qurylysyn toqtatyp, burynǵy qalpyna keltirý nemese nysandy zańdastyrý týraly nusqama berildi. «Qyzylorda» qonaq úıi, «Aızada Plaza» saýda ortalyǵy, «Talǵat» bazarynyń zańsyz dúńgirshekteri, Áıteke bı kóshesinde ornalasqan 3 qabatty saýda úıiniń jobadan aýytqyǵan bólikteri buzyldy, — dedi Mádı Álip.
Qurylys sapasyna baqylaý kúsheıtilgeli nysandardyń beriktigi men ornyqtylyǵyna tikeleı áser etetin zań talaptaryn óreskel buzǵan 4 tehnıkalyq qadaǵalaý sarapshysyna ákimshilik aıyppul salyndy. Oǵan qosa attestat qoldanysy 6 aıǵa toqtatyldy. Eki sarapshyǵa tıesili attestat kúshi joıyldy.
Eske salsaq, bıyl 10 aıda Qyzylorda oblysyndaǵy qurylys jumysyna bólingen qarjy kólemi 235 mlrd teńgege jetti.