Qyzylordada santehnıka shyǵaratyn jańa zaýyt salýǵa €70 mln tartylady

ASTANA. KAZINFORM – Qyzylordada sanıtarlyq-tehnıkalyq jabdyqtar shyǵaratyn iri zaýyt salynady. Bul týraly Úkimettiń baspasóz qyzmeti habarlady.

Joba ıspanııalyq Roca Group kompanııasymen birlesip júzege asyrylyp jatyr jáne atalǵan sala boıynsha Ortalyq Azııadaǵy eń iri jobalardyń birine aınalady.

Qyzylorda oblysynyń ákimi Nurlybek Nálibaevtyń aıtýynsha, jobaǵa tartylatyn ınvestıtsııa kólemi €70 mln. Al kásiporyndy iske qosý óńir turǵyndaryn 300 jańa jumys ornymen qamtýǵa múmkindik beredi. Zaýyt tek ishki naryqty ǵana qamtamasyz etip qoımaı, sonymen qatar ónimdi shetelge eksporttaýmen de aınalysady dep josparlanǵan.

– Memleket basshysynyń ınvestıtsııa tartý jónindegi tapsyrmasyn oryndaý úshin biz sheteldik ınvestorlarmen júıeli jumys júrgizip kelemiz. Ótken jyly Roca Group kompanııasymen Qyzylordada óndiris ornyn ashý máselesin talqyladyq. Kompanııa sanıtarlyq-tehnıkalyq buıymdar óndirý salasyndaǵy álemdik kóshbasshylardyń biri sanalady. Roca Grouppen birlesip óndiristi bastaý týraly negizdemelik kelisimge qol qoıyldy, - dep atap ótti ákim.

Aıta keteıik, Oljas Bektenov Santıago de Gomar Rokamen Qyzylorda oblysyndaǵy zaýyt qurylysyn talqylady.