Qyzylordada salmaǵy 549 gramm sábıge biregeı ota jasaldy
QYZYLORDA. KAZINFORM – Qyzylorda oblystyq perınataldy ortalyǵynyń dárigerleri salmaǵy nebári 549 gramm nárestege kúrdeli hırýrgııalyq operatsııa jasady.
Náreste ana qursaǵynda 24 apta 3 kún damyp, perınataldy ortalyqta kesar tiligi arqyly dúnıege kelgen. Ekstremaldy tómen salmaqpen týǵan sábıdiń jaǵdaıy ómiriniń 27-táýliginde kúrt nasharlaǵan.
- Shala týylý saldarynan baladan aýyr dárejeli bronhókpelik dısplazııa, neonataldyq pnevmonııa, nekrozdaýshy enterokolıt, perıtonıt jáne ishektiń tesilýi anyqtalǵan. Náresteniń jaǵdaıyn turaqtandyrý maqsatynda dereý qarqyndy emdeý sharalary júrgizilip, gemotransfýzııa (qan quıý) jasaldy. Osydan keıin tájirıbeli mamandar shuǵyl hırýrgııalyq otaǵa kiristi. Mamandardyń úılesimdi jumysynyń nátıjesinde toq ishektiń nekrozǵa (shirýge) ushyraǵan bóligi kesilip, stoma shyǵaryldy, - delingen habarlamada.
Kúrdeli otany neonataldy hırýrg B.Mahanbetııarov, kómekshi hırýrg S.Núsipqojaev jáne balalar anestezıology I.Samsonov jasady. Sondaı-aq operatsııalyq meıirger N.Uzaqbaı men meıirger Z.Saılaýbekova da ota barysynda joǵary kásibılik tanytty.
Mamandardyń aıtýynsha, otadan keıin náresteniń jaǵdaıy áli óte aýyr. Qazirgi ýaqytta ol jansaqtaý bóliminde qarqyndy em qabyldap jatyr. Sábıdiń jaǵdaıy dárigerlerdiń turaqty baqylaýynda.
Eske salaıyq, jýyrda Almaty onkologııalyq ortalyǵynda robottandyrylǵan hırýrgııalyq júıeniń kómegimen ókpe qaterli isigine qatysty alǵashqy eki operatsııa jasaldy.
