Qyzylordada respýblıka deńgeıindegi kúrdeli otalar jasalyp júr
QYZYLORDA. KAZINFORM — Qyzylorda oblysyndaǵy statsıonarlarda kún saıyn eresekterge 70, balalarǵa 30 túrli ota jasalady.
Oblystyq densaýlyq saqtaý basqarmasynyń málimetinshe, onyń 3-4-i — respýblıka deńgeıinde júrgiziletin kúrdeli otalar.
— Bıyl 6 aıda 56 joǵary tehnologııalyq medıtsınalyq kómek kórsetildi. Otanyń 4 jańa túri qoldanysqa endi. Olar — asqazan-baýyraralyq jylankózdiń klıpatsııasy, menısk túbiriniń tigisi, balalarda laporoskopııalyq pıeloplastıka, neırohırýrgııada vagýsty neırostımýlıatsııa. 84 naýqasqa arıtmologııalyq ota jasaldy. Budan bólek jambas býynyna 77, tize býynyna 151 endoprotezdeý otasy sátti oryndaldy, — dedi basqarma basshysy Almas Ábilpatta.
Óńirde zaman talabyna saı medıtsınalyq tehnologııalardy keńinen qoldaný arqyly jyl saıyn 800-ge jýyq onkologııalyq joǵary mamandandyrylǵan emdik-dıagnostıkalyq kómek kórsetiledi. Bul onkologııalyq aýrýlardy erte anyqtap, tıimdi em júrgizýge jáne naýqastardyń ómir sapasyn jaqsartýǵa múmkindik berip otyr.
Al elimizde zamanaýı ortalyqtardyń ashylyp, jańa tehnologııalardyń engizilýi nátıjesinde buryn shetelde em alýǵa májbúr bolǵan naýqastardyń 80 paıyzy qazir Qazaqstanda emdeledi.
