Qyzylordada referendým komıssııalary kestege saı jumys istep jatyr
QYZYLORDA. KAZINFORM — Qyzylorda oblysyndaǵy 387 referendým komıssııasy qajetti materıaldyq jabdyqpen tolyq qamtamasyz etildi. Bul týraly oblystyq aýmaqtyq referendým komıssııasy málimdedi.
Komıssııalar qazirgi kúni kestege sáıkes, demalyssyz jumys istep jatyr.
— Referendým ótkizýge daıyndyq qyzý. Ýchaskedegi komıssııa músheleri QR belgisi bar A4 formattaǵy 492,5 myńnan astam jeke shaqyrý qaǵazyn taratyp bitti. Ýchaskeniń meken-jaıy men telefon nómiri kórsetilgen 6340 aqparattyq plakat 1682 kópqabatty úıdiń kireberisine ilindi. Daýys berýshilerge óz ýchaskesin ońaı tabý úshin oblysta 4 arnaıy platforma júzege asyryldy. «Ózińdi daýys berýshiler tiziminen tekser» platformasy, referendum.orda.gov.kz jáne Telegram arnasynda t.me/referendumKzo_bot boty jumys istep tur. Sonymen birge 109 nómirli biryńǵaı baılanys ortalyǵy, qala jáne aýdan ákimdikteriniń janyndaǵy sall ortalyqtar belsendi túrde qyzmet kórsetedi. Azamattar úshin ýchaskeni anyqtaý qyzmeti bar arnaıy «Smart Qyzylorda» mobıldi qosymshasy iske qosyldy, — dedi komıssııa tóraǵasy Ádilbek Ersultanov.
Daýys berýshi azamattardy ýaqytsha tirkeýmen aınalysatyn 5 ýchaske jáne azamattardyń qaı ýchaskege tirkelgenin onlaın formatta aıqyndaıtyn 187 ýchaske daıyndaldy.
— Qazirgi tańda 1 paıyz rezervimen daýys berýge arnalǵan 497 449 bıýlleten basýǵa jiberildi. Bıýlletendi oblystyq polıtsııa departamentiniń qyzmetkerleri kúzetip tur. Olar daıyn bolǵan referendým bıýlletenderin barlyq aýdanǵa jetkizý úshin de súıemeldeıdi. Bıýlletender referendým aıaqtalǵannan keıin sol kúni oblystyq mekemeler úıindegi arnaıy jabdyqtalǵan saqtaý qoımasyna jetkiziledi. Zańǵa sáıkes daýys berý aıaqtalǵannan keıin ýchaskeler 12 saǵat ishinde daýys sanaý protsesin júrgizedi. Bul áreketterdi akkredıttelgen baıqaýshylar men BAQ ókilderi tirkelý arqyly kóre alady, — dedi komıssııa tóraǵasy.
Aıta keteıik, oblysta densaýlyq jaǵdaıyna baılanysty ýchaskege kelýge múmkindigi joq azamattardyń óz quqyǵyn paıdalanýyna jaǵdaı jasalyp otyr.