Qyzylordada «Rámizder rýhy – Konstıtýtsııanyń kúshi» atty jalpyulttyq patrıottyq aktsııa ótti

Oǵan oblystyq máslıhat tóraǵasy, oblys ákiminiń orynbasarlary, quqyq qorǵaý organdarynyń basshylary, oblystyq qoǵamdyq keńes tóraǵasy, zııaly qaýym, saıası partııalar, etnomádenı birlestikter, úkimettik emes uıymdar, jastar uıymdarynyń ókilderi qatysty.

Aktsııa «Memlekettik rámizder — táýelsizdik sımvoly» atty taqyryptyq prologpen ashyldy.

Aımaq basshysy jınalǵan qaýymdy Memlekettik rámizder kúnimen quttyqtap, el táýelsizdiginiń basty nyshandarynyń tarıhı máni men mańyzyna toqtaldy.

— Memleket basshysy: «Ult rámizderi — Táýelsizdigimizdiń kıeli boıtumary. Eltańba, Tý jáne Ánuran — myzǵymas memlekettigimizdiń belgisi. Qasterli nyshandarymyz Qazaqstannyń egemen el, eńseli jurt ekenin jer júzine áıgileıdi. Baıraǵy bıik eldiń rýhy asqaq bolady», — dep atap ótti.

Bizdiń memlekettik nyshandarymyz Qazaqstandy kúlli álemge beıbitshilik pen tatýlyqtyń sımvoly retinde dáripteýde. Kók týymyz halyqaralyq arenalarda, álemdegi alpaýyt uıymdardyń tórinde Táýelsiz Qazaqstannyń atyn tanytty. Aıbynymyzdy asyrǵan Memlekettik rámizderdi qurmettep ulyqtaý, keler urpaqqa amanat etý — bizdiń azamattyq paryzymyz.

Barshańyzdy Qazaqstan Respýblıkasynyń Memlekettik rámizderi kúnimen shyn júrekten quttyqtaımyn! Táýelsizdigimizdiń tumaryna aınalǵan memlekettik nyshandarymyz bolashaqqa bastaǵan uly kóshimizdi demep, ıgi isterimizdiń uıytqysy bola bersin! Birligimiz jarasyp, jarqyn bolashaqqa basqan ár qadamymyz nyq, el irgesi berik bolsyn! , — dedi Murat Nálqojauly.

Sharada hordyń súıemeldeýimen Memlekettik Ánuran shyrqalyp, jergilikti ónerpazdar patrıottyq ánder oryndady.

Rámizder kúnine arnalǵan aktsııa ıppodromda atty sherýmen jalǵasty. Sondaı-aq tótenshe jaǵdaılar qyzmetkerleri Syrdarııa ózeninde Memlekettik Týdy qaıyqpen alyp júrip, mereke mazmunyn aıshyqtaı tústi.