Qyzylordada probatsııada júgensiz ketken 44 adam túrmege qamaldy
QYZYLORDA. KAZINFORM — Qyzylordada probatsııa esebindegi 44 azamat túrmege qamaldy.
Qyzylorda oblysynda jaza óteý tártibin buzyp, probatsııalyq baqylaýǵa baǵynbaǵan eseptegi 44 sottalǵan bas bostandyǵynan aıyrylyp, túzeý mekemesine jiberildi.
Qazirgi tańda Qyzylorda oblysy boıynsha QAJ departamentiniń aýdandyq jáne qalalyq probatsııa qyzmetiniń esebinde 1000-ǵa jýyq sottalǵan bar.
Onyń arasynda jaza óteý tártibi men sot mindettegen talaptardy buzyp, probatsııalyq baqylaýǵa baǵynbaıtyn sottalǵandar da kezdesedi.
Olarmen profılaktıkalyq jumys júrgizilgenine qaramastan esh nátıje shyǵarmaǵan.
Probatsııa qyzmetkerleri 44 sottalǵannyń is-qujattaryn jınap, sotqa joldady. Sot qaýlysymen olar bas bostandyǵynan aıyrylyp, túzeý mekemesine jiberildi.
QAJ departamentiniń probatsııa qyzmetterine basshylyq jasaý tobynyń ınspektory, ádilet maıory Sábıgúl Tleýovanyń aıtýynsha, jýyrda Qyzylorda qalalyq probatsııa esebindegi taǵy bir sottalǵan túzeý mekemesine jiberilgen.
Ol Qyzylorda qalalyq № 2 sotynyń 2022 jylǵy 5 tamyzdaǵy úkimimen QR QK 188-baby 3-bóliginiń 3-tarmaǵy, 24-baby 3-bóligimen kináli dep tanylyp, 3 jylǵa bas bostandyǵy shektelgen edi.
Sondaı-aq jergilikti atqarýshy organdar aıqyndaıtyn oryndarda 100 saǵat májbúrli eńbekke tartylyp, probatsııalyq baqylaý belgilengen.
Alaıda, ol 100 saǵat májbúrli eńbekti oryndamaı, birneshe ret ákimshilik quqyq buzyp, túngi mezgilde qala aýmaǵynda júrip, turǵylyqty mekenjaıynda bolmaı, jaza óteý tártibin buzǵan.
Qaýly kúshine enip, jazasynyń ótelmegen bóligi — 1 jyl 27 kúnin temir torda óteıtin boldy.
— Esepke qoıý kezinde probatsııa qyzmetkerleri eseptegi tulǵalarǵa sot júktegen mindetterdi oryndaý, jaza óteý tártibin buzbaý jáne baqylaýdan jasyrynbaý, oıyn-saýyq oryndaryna barmaý, mekenjaıdy eskertýsiz tastap ketpeý sekildi mindetterin túsindirip, jaza óteý tártibin buzǵan jaǵdaıda jazasy bas bostandyǵynan aıyrýǵa aýystyrylatyny jóninde eskertip, tolyq aqparattandyrady. Alaıda eskertýge qulaq aspaǵandar túzeý mekemesine jiberilip jatyr, -deıdi ádilet maıory Sábıgúl Tleýova.
