Qyzylordada probatsııa talaptaryn buzǵan turǵyn sot zalynan qamaýǵa alyndy
ASTANA. KAZINFORM — Shıeli aýdandyq probatsııa qyzmetiniń esebinde turǵan azamat sot júktegen mindetterdi oryndamaı, probatsııalyq baqylaý talaptaryn birneshe ret buzǵany úshin bas bostandyǵynan aıyryldy, dep habarlaıdy Polisia.kz.
Turǵyn mal urlyǵy qylmysyn jasaǵany úshin sot úkimimen 3 jyl merzimge bas bostandyǵyn shekteý jazasy boıynsha probatsııalyq baqylaýǵa alynǵan. Alaıda esepke alynǵan sátten bastap probatsııa qyzmetiniń ınspektorlary oǵan jazany óteý tártibi men zań talaptaryn birneshe ret túsindirgenine qaramastan, ol ózine júktelgen mindetterdi oryndamaǵan. Atap aıtqanda, jazany óteýden qasaqana jaltaryp, elektrondy baqylaý bilezigin ádeıi kesip, búldirgen. Sonymen qatar túngi ýaqytta turǵylyqty mekenjaıynda bolmaǵan.
Atalǵan zań buzýshylyqtary úshin oǵan 4 ret eskertý túrindegi tártiptik shara qoldanylǵan. Alaıda ol tıisti qorytyndy shyǵarmaı, probatsııalyq baqylaý talaptaryn buzýdy jalǵastyrǵan.
Osyǵan baılanysty Shıeli aýdandyq probatsııa qyzmeti sotqa bas bostandyǵyn shekteý jazasynyń ótelmegen bóligin bas bostandyǵynan aıyrý jazasyna aýystyrý týraly usynys engizgen.
Sot qaýlysymen jazanyń ótelmegen 1 jyl 2 aı merzimi bas bostandyǵynan aıyrý jazasyna aýystyryldy. Osylaısha, turǵyn sot zalynda qamaýǵa alyndy.
Probatsııalyq baqylaýdyń negizgi talaby — sottalǵan azamattyń zań talaptaryn saqtap, sot júktegen mindetterdi múltiksiz oryndaýy. Belgilengen tártipti qasaqana buzý zańda kózdelgen jaýaptylyqqa ákep soǵady.
Aıta keteıik, Qyzylordada bir aıda 139 adam probatsııalyq baqylaý talabyn buzǵan.