Qyzylordada probatsııa esebinde turǵan 42 sottalǵan kvotamen jumysqa ornalasty
QYZYLORDA. KAZINFORM – Qyzylorda qalalyq probatsııa qyzmetinde 500-den astam sottalǵan esepte turady. Probatsııalyq baqylaý belgilengen jumyssyz sottalǵandardy jumysqa turǵyzý jumystary júıeli túrde júrgizilip jatyr. Bul týraly Qyzylorda oblystyq Qylmystyq-atqarý júıesi departamentiniń baspasóz qyzmeti málim etti.
Málim bolǵandaı, Atap jyl basynan beri esepte turǵan jumyssyz 42 sottalǵan kvotamen jumysqa turǵyzylǵan.
Qalalyq probatsııa qyzmetiniń bastyǵy ádilet maıory Farıza Sembaevanyń aıtýynsha bas bostandyǵynan aıyrý oryndarynan bosatylǵan jáne probatsııa qyzmetiniń esebinde turǵandardy jumyspen qamtý maqsatynda Qyzylorda qalasy ákimdiginiń qaýlysymen jumys oryndaryna 42 kvota belgilengen.
«Probatsııa esebindegi 42 sottalǵan jumysqa turǵyzylyp, kvotany júz paıyzǵa oryndadyq. Sonymen qosa, kvotadan bólek taǵy 3 sottalǵandy jumysqa ornalastyrdyq. Qazirgi tańda olar jumystaryn jasap júr. Sondaı –aq sottalǵandar arasynda óz kásibin ashqandar da bar. Jyl basynan 12 azamat memleketten qaıtarymsyz qarajat utyp alyp, kásibin dóńgeletip otyr. Eseptegi tulǵalarǵa áleýmettik, quqyqtyq basqa da kómekter udaıy kórsetiledi. Jalpy probatsııa esebindegi sottalǵandar qyzmetkerler tarapynan árdaıym baqylaýda bolady. Qyzmetkerler eseptegi árbir azamattyń turǵylyqty mekenjaıynan kúndelikti tekserý jumystaryn júrgizip, zańbuzýshylyqqa qarsy túsindirme jumystaryn júrgizedi», — dedi ádilet maıory Farıza Sembaeva.
Al, esepte turǵan azamattardyń biri ózdiginen jumys izdep taba almaǵanyn aıtady.
«Probatsııa qyzmetiniń kómegimen jumys taptym. Jumysyma ýaqytyly baryp júrmin. Jumysshy retinde qazir jumys jasap jatyrmyn. Eki qolǵa bir kúrek tapqany ma qýanyp júrmin. Túzý júrip, otbasymdy adal eńbegimmen asyraımyn», — deıdi ol.
