Qyzylordada polıtsııa qyzmetkerine dórekilik kórsetken jasóspirimge qatysty qylmystyq is qozǵaldy

QYZYLORDA. KAZINFORM – Áleýmettik jelide jasóspirimderdiń polıtsııa qyzmetkerine dórekilik kórsetken vıdeosy tarady. Vıdeo Instagram áleýmettik jelisindegi Livenews.kz paraqshasynda jarııalandy. Qyzylorda oblystyq polıtsııasy bul jaǵdaı oblys aýmaǵynda túsirilgenin málimdedi.

— 10 maýsym kúni tańǵy saǵat 5 jarym shamasynda oblys ortalyǵyndaǵy aýdandardyń birinde polıtsııa qyzmetkerleri tynyshtyqty buzý týraly habarlama boıynsha barǵan. Atalǵan quqyqbuzýshylyq boıynsha jasóspirimder ustalyp, barlyǵy ákimshilik jaýapkershilikke, onyń ishinde túngi ýaqytta zańdy ókilinsiz kóshede júrgenderi úshin de jaýapkershilikke tartyldy. Jasóspirimderdiń birine qatysty bılik ókilin qorlaý deregi boıynsha qylmystyq is qozǵaldy. Sondaı-aq jasóspirimderdiń ata-analary kámeletke tolmaǵan balany tárbıeleý jónindegi mindetterin oryndamaǵany úshin ákimshilik jaýapkershilikke tartyldy. Barlyq derek boıynsha tıisti sharalar qabyldanady, — delingen habarlamada.

Polıtsııa departamenti zań talaptaryn saqtaý jasy men mártebesine qaramastan árbir adamnyń mindeti ekenin eske saldy.

— Quqyqtyq tártipti qamtamasyz etetin qyzmetkerlerge qurmet kórsetpeý zańdy qurmettemeýmen birdeı, — dep eskertti vedomstvo.

Buǵan deıin biz Instagram áleýmettik jelisinde Qyzylorda qalasynda júrip kele jatqan kólikte ersi qylyq kórsetip trend túsirgen jastardyń vıdeosy taraǵanyn, oǵan da oblystyq polıtsııa departamenti túsinikteme bergenin habarlaǵan edik.