Qyzylordada polıtseılerge pyshaq ala umtylǵan adam ustaldy

Qyzylorda oblysynda polıtseılerge pyshaq ala umtylǵan 32 jastaǵy turǵynnyń ústinen qylmystyq is qozǵaldy, dep habarlaıdy QazAqparat tilshisi. 

Jalaǵash aýdandyq polıtsııa bóliminiń patrýldik polıtsııa tobynyń qyzmet ınspektory jol qozǵalysy erejesin buzǵan kólikti toqtatqan. Tártip saqshylary zań sheńberinde ÝAZ kóliginiń júrgizýshisinen qujattaryn usynýyn surady.

Sol sátte júrgizýshi balaǵat sózder aıtyp, zańdy talabyna baǵynbaǵan. Polıtseılerge pyshaqpen umtylyp, kıimin jyrtqan. Qarsylyq kórsetken azamat Jalaǵash aýdanynyń 32 jastaǵy turǵyny bolyp shyqty. Avtokólik aıyp alańyna qoıyldy. Osy oqıǵa boıynsha QR QK-niń 380-babynyń 1-bóligimen sotqa deıingi tergep-tekserý áreketteri júrgizilip jatyr. Tıisti saraptamalar taǵaıyndaldy. Kúdikti polıtsııa bóliminiń ýaqytsha ustaý ızolıatoryna qamaldy.

«Osy oraıda barlyq azamatty tártip pen zańdylyqty saqtaýǵa, polıtsııa qyzmetkerleriniń zańdy talabyna baǵynýǵa shaqyramyz. Qyzmettik mindetin atqaryp júrgen bılik ókiline qarsylyq kórsetkender úshin qylmystyq jaýapkershilik kózdelgen», - dedi Qyzylorda oblysy polıtsııa departamentiniń bastyǵy Mahsýdhan Ablazımov.

Eske salsaq, budan buryn Qyzylordada skýter tizgindegen jasóspirim jol apatyna ushyrady.