Qyzylordada pırotehnıkalyq ónimderge qatysty 12 ákimshilik quqyq buzýshylyq anyqtaldy

QYZYLORDA. KAZINFORM - Qyzylorda oblysynda oblys kólemindegi bazarlar men iri saýda ortalyqtarynda pırotehnıkalyq ónimderdi durys qoldanbaýǵa qatysty 12 ákimshilik quqyq buzýshylyq anyqtaldy.

Oblys kóleminde 5 jeltoqsan - 3 qańtar aralyǵynda «Pırotehnıka» jedel profılaktıkalyq is-sharasy ótkizilýde. Іs-shara barysynda zańdy jáne jeke tulǵalardyń pırotehnıkalyq ónimderdi saqtaý, satyp alý jáne tasymaldaý tártibiniń saqtalýyn tekserý jaǵdaıy nazarǵa alyndy.

- Sondaı-aq, sertıfıkattalmaǵan ónimdi jetkizýshiler men osy ónimderdiń saldarynan bolatyn tótenshe jaǵdaılardyń aldyn alý da dál osy profılaktıka kezinde anyqtalady. Osy is-shara barysynda oblys kólemindegi bazarlar men iri saýda ortalyqtarynda oblystyq polıtsııa departamentiniń Ákimshilik polıtsııa basqarmasy men TJD qyzmetkerlerimen birge reıd jumystary júrýde. Іs-shara barysynda barlyǵy 12 ákimshilik quqyq buzýshylyq anyqtalyp, 254 dana pırotehnıkalyq buıym tárkilendi. Bul baǵyttaǵy jumystar óz jalǵasyn tabatyn bolady, - dedi oblystyq Polıtsııa departamentiniń Ákimshilik polıtsııa basqarmasy bastyǵynyń orynbasary Nurken Baqtııarov.

Oblys boıynsha jańa jyldyq merekelik is-sharalar ótetin 523 obektiniń tizimi naqtylandy.

Oblystyq TJD memlekettik órt baqylaý basqarmasynyń basshysy Ashat Orazbekov barlyq is-shara ótetin oryndardyń órt qaýipsizdigi jaǵdaıyna tekserý júrgizilgenin atap ótti.

- Nátıjesinde 119 órt qaýipsizdiginiń buzýshylyǵy anyqtalyp, joıý úshin nusqama berildi. Aıta ketsek, pırotehnıkalyq buıymdardy qoldaný barysynda nusqaýlyqty muqııat oqyp, fıtıldi qol sozym araqashyqtyqta tutandyryp, qaýipti aımaqtan keminde 20 metr qashyqtyqta ornalasý qajet. Sonymen qatar, tutandyrylǵan pırotehnıkalyq buıymdardy qolda ustaýǵa, olardy bólme ishinde paıdalanýǵa qatań tyıym salynady, - dedi A.Orazbekov.

Eske salsaq, budan buryn Qyzylordalyq qutqarýshylar 90 jastaǵy qarııaǵa kómek kórsetti.