Qyzylordada paıdaly qazbany zańsyz óndirgenderge 2,3 mln teńge aıyppul salyndy

QYZYLORDA. KAZINFORM – 2025 jyldyń І jartysynda Qyzylorda oblysynyń qorshaǵan ortany qorǵaý salasyndaǵy 20 sýbektige baqylaý sharalary uıymdastyryldy. Nátıjesinde ekologııalyq zańnama talaptaryn buzýdyń 43 deregi anyqtalyp, kemshilikterdi joıý jóninde 43 nusqama berildi.

Oblystyq ekologııa departamenti málimdegendeı, anyqtalǵan zańbuzýshylyqtar boıynsha ákimshilik ister qozǵalǵan. Jeke jáne zańdy tulǵalarǵa 19,7 mln teńge kóleminde aıyppul salynsa, sonyń 9,7 mln teńgesi óndirildi. 

– 1 sýbektige ekologııalyq ruqsatynyń bolmaýyna baılanysty hattama toltyrylyp, ákimshilik is sotqa joldandy. Sot onyń sharýashylyq qyzmetin 6 aı merzimge toqtatyp, 16 mln teńge kóleminde ákimshilik aıyppul saldy. Zańsyz karerlerdi anyqtaý, zerttep-qaraý, monıtorıng júrgizý jáne tıisti sheshim qabyldaý úshin quqyq qorǵaý organdarymen, múddeli memlekettik mekemelermen birlesken reıd júrgizdik. Nátıjesinde keń taralǵan paıdaly qazbalardy zańsyz óndirýdiń 15 deregi anyqtalyp, quqyq buzýshylarǵa jalpy somasy 2,3 mln teńge kóleminde ákimshilik aıyppul salyndy, - dedi departament basshysynyń mindetin atqarýshy Almas Ysqaqov.

«Qazaqstan Ǵarysh sapary» AQ júrgizgen ǵaryshtyq monıtorıng arqyly 88 ruqsatsyz qaldyq orny anyqtalyp, olar az ýaqytta tolyǵymen joıyldy.

Al buǵan deıin Jetisý oblysynyń Alakól aýdanynda memlekettik menshikke tıesili jer ýchaskesin óz betinshe paıdalaný faktisi anyqtaldy.