Qyzylordada ota kezinde naýqastyń denesinde dáke qalyp qoıǵan: sot 1,5 mln teńge óndirdi
ASTANA. KAZINFORM — Qyzylorda oblysynyń turǵyny hırýrgııalyq otadan keıin denesinde dáke tampony qalyp qoıǵanyn aıtyp, sotqa júgingen. Sot medıtsınalyq mekemede birqatar zańbuzýshylyq bolǵanyn anyqtap, naýqastyń paıdasyna materıaldyq jáne moraldyq zııan úshin 1,5 mln teńgeden astam ótemaqy óndirdi. Bul týraly Joǵarǵy sot málim etti.
Jiberilgen medıtsınalyq qateliktiń saldarynan naýqas uzaq ýaqyt boıy qatty aýyrsynýdy bastan keshirip, durys emdemegen jaradan zardap shekken jáne óz esebinen qaıta ota jasatýǵa májbúr bolǵan.
Osyǵan baılanysty ol medıtsınalyq mekemeden materıaldyq shyǵyn men moraldyq zııannyń ornyn toltyrýdy talap etken.
— Sot bastapqyda talap qoıýshyǵa kıstany alyp tastaý otasy jasalǵanyn anyqtady. Alaıda, eki aıdan keıin oǵan basqa medıtsınalyq mekemede qaıta ota jasalǵan, onyń barysynda aldyńǵy hırýrgııa aımaǵynan buryn qalǵan dáke tampony alynǵan, — delingen habarlamada.
Bógde zattyń bolý faktisi ota jasaý hattamasymen, medıtsınalyq qujattamamen, beınejazbamen, sondaı-aq qaıta emdeý júrgizilgen medıtsınalyq mekeme ókiliniń túsindirmesimen rastaldy.
— Naýqastyń otadan keıingi asqynýlarynyń dáleli retinde (durys emdemegennen uzaq ýaqyt boıy asqynǵan jara, qabyný protsesi, kúndelikti tańý qajettiligi) sot emdeýshi dárigerdiń medıtsınalyq qujattary men túsindirmelerin qabyldady. Jospardan tys tekserý nátıjesinde medıtsınalyq qyzmetterdiń sapasyn baqylaý jónindegi ýákiletti organ medıtsınalyq kómek kórsetý kezinde kóptegen buzýshylyqtardy anyqtady, — dep habarlady quzyrly organnan.
Ota jasaý kezinde mindetti standarttar saqtalmaǵany, otadan keıingi baqylaý durys júrgizilmegeni, medıtsınalyq qujattama buzýshylyqtarmen júrgizilgeni anyqtaldy: kúndelikti jazbalar tolyq emes, zertteý nátıjeleriniń klınıkalyq túsindirmesi, sondaı-aq ota jasaý kezinde alynǵan materıaldardy zertteý týraly málimetter joq.
Sot usynylǵan dáleldemelerdi zertteı otyryp, jaýapkerdiń kinási dáleldengen degen qorytyndyǵa keldi jáne talap qoıýdy qanaǵattandyrdy.
Medıtsınalyq mekemeden talap qoıýshynyń paıdasyna moraldyq zııan men materıaldyq zalaldyń ornyn toltyrý esebinen 1,5 mln teńgeden astam qarajat óndirilgen.
Buǵan deıin BQO aýrýhanasy sapasyz qyzmet úshin marqumnyń týystaryna ótemaqy tóleıtin bolǵanyn jazdyq.
