Qyzylordada órt sharpyǵan aýmaq kólemi birneshe ese artty
QYZYLORDA. KAZINFORM — Kún ysyǵaly beri Qyzylorda oblysynyń memlekettik orman qory aýmaǵynda 26 órt oqıǵasy tirkeldi.
Oblystyq tótenshe jaǵdaılar departamentiniń málimetinshe, jalpy aýmaǵy 1295 gektardan astam jerdi qyzyl jalyn sharpydy. Bul ótken jyldyń sáıkes kezeńimen salystyrǵanda birneshe ese joǵary.
— Órttiń basym bóligi Jalaǵash, Shıeli, Aral jáne Syrdarııa aýdandarynda tirkelgen. Biraz órt oshaǵy geoportal júıesi men reıdtik is-sharalar barysynda anyqtalsa, keıbir jaǵdaılar qaldyq nemese shóp órteý kezinde talapty saqtamaǵannan bolǵan. Ashyq otty paıdalaný kezindegi salǵyrttyq ta tilsiz jaýǵa jol ashyp bergen. Kináliler jaýapkershilikke tartylyp, tıisti is-sharalar qabyldandy, — dedi departamenttiń memlekettik órt baqylaý basqarmasynyń bastyǵy Beıbithan Spanov.
Óńirde qaýipsizdik talaptarynyń saqtalýyna baqylaý kúsheıdi. Jyl basynan beri orman sharýashylyǵy, polıtsııa jáne jergilikti atqarýshy organ ókilderiniń qatysýymen 50-den astam reıd uıymdastyryldy. 125 profılaktıkalyq is-shara ótti. Oǵan 1400-den astam turǵyn qatysty.
Oblystyq tótenshe jaǵdaılar departamenti buǵan deıin órttiń basym bóligi turǵyn úı sektorlarynda tirkelgenin málimdegen bolatyn.
