Qyzylordada orman órti 40%-ǵa artty
QYZYLORDA. KAZINFORM — Bıyl 10 aıda 985 nysanda baqylaý is-sharasyn júrgizgen qyzylordalyq qutqarýshylar 6053 zańbuzýshylyqty anyqtady.
Osyǵan baılanysty 875 ákimshilik is qozǵalyp, 18 mln teńgeden astam aıyppul salyndy. Ákimshilik ister sany 21,9%-ǵa, aıyppul somasy 35,8%-ǵa artqan.
— Ákimshilik quqyqbuzýshylyq týraly kodekstiń 462-babynyń 3-bóligi boıynsha 57 hattama sotqa joldandy. Onyń 47-si boıynsha 15 mln 310 myń teńgeden astam aıyppul salyndy. 6 is qaraýsyz qaldyryldy, 4 is sottyń qaraýynda, — dedi oblystyq tótenshe jaǵdaılar departamenti bastyǵynyń birinshi orynbasary Jasulan Túımenov.
Órttiń basym bóligi turǵyn sektory (233) men avtokólikterde (111) tirkeldi. Orman órti 40%-ǵa artyp, 28 jaǵdaı esepke alyndy.
— Áleýmettik osal sanattaǵy azamattar turatyn 5 864 turǵyn úıdiń tizimi jasalyp, kómirtegi totyǵyn anyqtaıtyn 300 datchık satyp alyndy. Qyzmetkerler 16,5 myńǵa jýyq turǵyn úıdiń aýlasyn aralap, 175 kezdesý ótkizip, profılaktıkalyq jumys júrgizdi, — dedi departament ókili.
Eske salaıyq, buǵan deıin TJD Almatynyń turǵyn úılerindegi órttiń negizgi sebepterin atady.
