Qyzylordada ońaltý kómegin qarjylandyrý kólemi 1,5 ese artty
QYZYLORDA. KAZINFORM – Osy jyldyń alǵashqy tórt aıynda Qyzylorda oblysyndaǵy kúndizgi jáne táýlik boıy jumys isteıtin statsıonarlarda 3 912 patsıent medıtsınalyq ońaltýdan ótti. 13 789 ambýlatorııalyq ońaltý qyzmeti kórsetildi. Bul týraly Áleýmettik medıtsınalyq saqtandyrý qory Qyzylorda oblysy boıynsha fılıalynyń dırektory Jaqsylyq Ábdýsámetov málimdedi.
Onyń aıtýynsha, mindetti áleýmettik medıtsınalyq saqtandyrý júıesiniń arqasynda óńirde ońaltý kómegin qarjylandyrý kólemi jyl saıyn artyp keledi.
– Eger 2022 jyly ońaltý kómegine 2,7 mlrd teńge bólinse, 2026 jyly qarjylandyrý kólemi bir jarym eseden astam ósip, 4,1 mlrd teńgege jetti. Bıylǵy tórt aıda medıtsınalyq ońaltý qyzmetin kórsetýge 1,2 mlrd teńge baǵyttaldy, – dedi fılıal basshysy.
Medıtsınalyq ońaltý patsıentterge aýyr syrqat, jaraqat jáne hırýrgııalyq aralasýdan keıin aǵzanyń joǵalǵan fýnktsııasyn qalpyna keltirýge, kúndelikti ómirge qaıta oralýǵa múmkindik beredi.
– Kóptegen adam mundaı kómekti qymbat ári qoljetimsiz dep esepteıdi. Alaıda medıtsınalyq kórsetilim bolǵan jaǵdaıda em tegin medıtsınalyq kómektiń kepildik berilgen kólemi sheńberinde negizgi aýrýdy, sondaı-aq týberkýlezben aýyratyndardy emdeý kezinde, mindetti áleýmettik medıtsınalyq saqtandyrý júıesinde aýrýlar men problemalardyń halyqaralyq jiktemesi boıynsha aýrýlar tizbesine sáıkes tegin júrgiziledi, – dedi Jaqsylyq Ábdýsámetov.
Aıta keteıik, elimizde bıylǵy qańtar aıynan bastap buǵan deıin MÁMS júıesine kirmegen 800 myńnan asa adam saqtandyrý mártebesine ıe bolǵanyn jazdyq.
