Qyzylordada oqýshyny seks quldyqqa salǵan kúdiktiler ádil jazasyn alady - Marat Qojaev

ASTANA. KAZINFORM — Іshki ister mınıstriniń burynǵy birinshi orynbasary jáne jaqynda senator bolǵan Marat Qojaev qyzylordalyq oqýshyny jezókshelikke májbúrleý oqıǵasyna qatysty pikir aıtty.

«Bul oqıǵanyń barlyq mán-jaıyn, onyń sebepterin túsinip almaı, qorytyndy jasaýǵa áli erte. Bul istiń barlyq jaı-japsary sotta zerttelip, naqty quqyqtyq baǵa berilgende, oqıǵaǵa qatysty naqty shyndyqty biletin bolamyz. Meniń tergeýshi retindegi 30 jyldyq tájirıbem bar. Bul turǵyda osy aralyqta mundaı biraz oqıǵa esimde qaldy. Sol kezderi qoǵamdyq rezonans bolmasa da, ádil sot úkimi shyqty... Sotta áleýmettik jelidegi dúrbeleń emes, naqty protsessýaldyq dálelder ǵana baǵalanady», - dedi M.Qojaev Senattyń jalpy otyrysynan keıin tilshiler suraǵyna jaýpa bere otyryp.

Onyń sózine qaraǵanda, bul is boıynsha kúdiktiler jazadan qutylmaıdy. Bul turǵyda qoǵamnyń quqyq qorǵaý organdaryna degen senim joǵary.

«Qoǵamda ondaı qorqynysh joq. Halqymyzdyń basym kópshiligi elimizdiń zań júıesine senedi dep oılaımyn», - dedi depýtat.

Eske salsaq, bıyl tamyz aıynda Qyzylorda qalasynda mektep oqýshylary synyptasyn seks-quldyqta ustady degen kúdikke ilindi. 

Bir top jasóspirim 16 jasar qyzdy qınap ustaǵany, esirtki berip, jezókshelikpen aınalysýǵa májbúrlegeni týraly aqparat tarady. Oqýshy qyzdyń ata-anasy bul jaǵdaıdy qoǵamdyq qorǵa habarlaǵan.

Qyzylorda polıtsııasy atalǵan derek boıynsha kúdiktilerdi ustap, ýaqytsha ustaý ızolıatoryna qamady. Keıin kúdikke ilingen mektep oqýshylary úıqamaqqa aýystyryldy.

QR Іshki ister mınıstrliginiń baspasóz qyzmeti qyzylordalyq oqýshyny jezókshelikke májbúrleýge qatysty atyshýly isti tergeý qalaı júrip jatqanyn aıtty. Vedomstvonyń habarlaýynsha, kúdikti dep tanylǵan 11 adamnyń beseýi kámelet jasyna tolmaǵan.