Qyzylordada oqýshy ólimine kúdikti 17 jastaǵy jasóspirim ustaldy

QYZYLORDA. KAZINFORM - Qyzylorda oblysynda toǵyzynshy synyp oqýshysynyń ólimine alyp kelgen aýyr dene jaraqatyn saldy degen kúdikpen 17 jastaǵy jasóspirim ustaldy.

Bul oqıǵany Qyzylorda oblystyq Polıtsııa departamentiniń baspasóz qyzmeti rastap, tómendegishe túsinikteme berdi.

- Kúdikti ýaqytsha ustaý ızolıatoryna qamaldy. Oǵan qatysty tergeý áreketi júrgizilip jatyr. Sondaı-aq atalǵan qylmysqa qatysy bar taǵy eki adamǵa qatysty buzaqylyq jasaǵany úshin qylmystyq is qozǵaldy. Olarǵa qatysty úıqamaqqa alý túrindegi bultartpaý sharasy tańdaldy, - dep jazylǵan habarlamada.

Eske salsaq, budan buryn Qyzylorda oblysynda jasóspirimniń ólimine sebepshi bolǵan onynshy synyp oqýshysyna qatysty sot úkimi shyqty.