Qyzylordada oblystyq azamattyq forým ótti
Qazaqstannyń XI Azamattyq forýmy qarsańynda Qyzylorda qalasynda «Azamattyq qoǵam jáne mádenıet: Qazaqstannyń jańarýy baǵytyndaǵy qundylyqtar men basym baǵyttar» atty óńirlik forým ótti, dep habarlaıdy QazAqparat.
Forýmǵa Parlament Senatynyń depýtaty Rýslan Rústemov, Mádenıet jáne aqparat mınıstrliginiń ókili, oblystyq máslıhat depýtattary, basqa óńirlerdegi, óz aımaǵymyzdaǵy azamattyq qoǵam uıymdarynyń jetekshileri, zııaly qaýym, jastar, mádenıet salasynyń mamandary men arnaıy Qazaqstannyń Azamattyq alıansy prezıdenti Baný Nurǵazıeva qatysty.
Іs-sharada sóz sóılegen oblys ákimi Nurlybek Nálibaev óńirdegi aýqymdy jobalar týraly baıandap, ÚEU-niń aımaqtyń qoǵamdyq ómirindegi mańyzdy rólin atap ótti.
«Táýelsiz elimizdiń tarıhynda demokratııalyq qundylyqtar men azamattyq bastamalardy damytýda, reformalardy júzege asyrýda, memlekettik organdarmen baılanys ornatyp el múddesi jolynda qyzmet etýde Azamattyq alıanstyń alar orny erekshe. Aımaǵymyzdyń Azamattyq alıansyn basqarǵan Darıha Aqmaǵambetqyzy, Álıma Jaqypqyzy úkimettik emes uıymdardy biriktire otyryp, óńirimizde azamattyq qoǵamnyń damýyna eleýli úles qosty. Azamattyq qoǵam men atqarýshy bılik arasynda baılanys ornatyp, jarqyn isterdiń úlgisin kórsetti. Búginde qaýymdastyq tóraǵasy Anar Jarylqasynqyzy aǵa býyn salǵan izgi joldy jalǵastyrýda. Alıanstyń bastamasymen jyl basynan beri 372 úkimettik emes uıymǵa keńes berilip, 37 aýqymdy shara ótkizildi. Aýyldyq úkimettik emes uıymdardyń forýmy ótkizilip, qajettilikter kartasy jasaqtaldy. 2020 jyldan beri ÚEU basshylarynyń áleýetin arttyrýǵa arnalǵan Jazǵy quqyqtyq mektep júıeli túrde uıymdastyrylyp keledi», - dedi aımaq basshysy.
Іs-sharada Parlament Senatynyń depýtaty Rýslan Rústemov forým jumysyna sáttilik tilep, Syr elinde qolǵan alynǵan mańyzdy jobalardy atap ótti.
QR Mádenıet jáne aqparat mınıstriligi Azamattyq qoǵam isteri komıteti tóraǵasynyń orynbasary Gúlbara Sultanova, QR Eńbek sińirgen qaıratkeri Almas Almatov, áleýmettik jobalardyń fandraızıngi salasyndaǵy halyqaralyq trener, aǵa eksperttik senor Norbert Shtoldt, «Kitap qurttary» qozǵalysynyń lıderi Talǵat Meńdibaev óz salalary boıynsha maqsat-mindetteri men aldaǵy josparlaryn tanystyrdy.
Jıyndy qorytyndylaǵan Qazaqstannyń Azamattyq alıansy prezıdenti Baný Nurǵazıeva óńirde júzege asyrylǵan ıgi bastamalarǵa qoldaý bildirip, áriptesteriniń jumysyna sáttilik tiledi.
Sońynda túrli baǵyttarda tabysty qyzmet etip, óńirdiń qoǵamdyq damýyna belsene atsalysqan azamattar marapattaldy.
