Qyzylordada naýqastarǵa kútim jasaýdy úıretetin mektep ashyldy

QYZYLORDA. KAZINFORM – Qyzylorda medıtsınalyq joǵary kolledjinde «Patsıentter men olardyń týystaryna kútim jasaý tásilderin oqytý» atty arnaıy mektebi ashyldy. Bul týraly kolledjdiń baspasóz qyzmeti habarlady.

Mundaı múmkindik kolledj basshylyǵy men Latvııanyń Rıga medıtsınalyq kolledji arasyndaǵy Eýroodaq deńgeıindegi memorandým aıasynda osy oqý ornynyń ozyq tájirıbesi negizinde paıda boldy. 

Aıta keteıik, ekijaqty kelisimge sáıkes byltyr jyl sońynda oblystyq densaýlyq saqtaý basqarmasynyń basshysy Oljas Ysqaqov bastaǵan delegatsııa Latvııada ótken halyqaralyq konferentsııaǵa qatysty. Іssapar barysynda qyzylordalyq delegatsııa bilim alý, tájirıbe almasý maqsatynda sol eldiń emdeý mekemelerine baryp, patsıentter men olardyń týystaryna kútim jasaý ádisterin oqytý júıesimen tanysty.

– Bıyl sáýir aıynda Rıga-1 medıtsınalyq kolledjiniń lektorlary, Rıgadaǵy №2 aýrýhananyń meıirgerlik kútim bólimshesiniń aǵa meıirgerleri Inga Prıede, Sendııa Shpatss-Dagemen, kópbeıindi damý jónindegi maman Ilze Vatsıete bizge kelip, meıirger isi pániniń oqytýshylaryna, emhana meıirgerlerine dáris ótip, sertıfıkat tabystady. Trenerler aımaqtaǵy barlyq emhananyń meıirgerlerin, naýqastar men olarǵa kútim jasaıtyn jaqyndaryn oqytýdy bastady. Ázirge 15 patsıent pen týystary bilimin tolyqtyrdy, - dedi Qyzylorda medıtsınalyq joǵary kolledjiniń dırektory Janar Qalmaqova.

Sonyń biri – qala turǵyny Gúlnar Serikbekqyzy. Joldasy ınsýlt alyp, tósekke tańylǵaly onyń kútimimen ózi aınalysyp júr. Sondyqtan bul kýrstyń mańyzy zor dep esepteıdi. 

– Birinshi ret basymyzǵa osyndaı jaǵdaı tústi. Mundaıda naýqastyń ózine de, kútýshisine salmaq artylady. Kóp nárseni bilmegendikten mektepte oqý barysynda biraz paıdaly málimet alyp, tájirıbege qanyqtym, - dedi ol. 

Tájirıbeli trenerler patsıentter men olardyń týysqandaryna tósekke tańylǵan naýqasqa qalaı kútim jasaý, jambasy oıylyp qalmas úshin ne isteý keregin, ergonomıka, ınsýlt, dementsııa, taǵy basqa dıagnozy bar naýqastardy ońaltý tásilderin úıretip júr. Sabaq barysynda jasandy ıntellekt ázirlegen platformalar da paıdalanylady. 

Aıta keteıik, bıyl óńirdiń densaýlyq saqtaý júıesine 117,4 mlrd teńge qarjy bólindi.