Qyzylordada moıyn omyrtqasyna alǵash ret kúrdeli ota jasaldy
QYZYLORDA. KAZINFORM — Naýqas jabyq omyrtqa jaraqaty, omyrtqa doǵalarynyń synýy, Djefferson synyǵy dıagnozdarymen Qyzylorda oblystyq kópbeıindi aýrýhanasynyń neırohırýrgııa bólimine túsken.
Medıtsınalyq uıymnyń baspasóz qyzmeti habarlaǵandaı, moıyn omyrtqasyna alǵashqy kúrdeli ota sheberlik saǵaty aıasynda jasaldy.
Oǵan Shymkent qalasynan kelgen medıtsına ǵylymdarynyń kandıdaty, neırohırýrg A.Sansyzbaeva jáne osy aýrýhananyń bólim meńgerýshisi A.Ábdiqalyqov, dáriger-ordınator N.Baıdúısenov bastaǵan jergilikti neırohırýrgtar qatysty.
— Ota S1, S2 moıyn omyrtqalarynyń anatomııalyq aımaǵynda mıdy qanmen jáne ottegimen qamtamasyz etetin negizgi omyrtqalyq arterııalardyń ornalasýyna baılanysty kúrdeli bolyp esepteledi. Sondyqtan omyrtqalyq arterııalardy zaqymdamaı, anatomııalyq turǵydan dál baǵytta jumys isteý mańyzdy. Burandalardy omyrtqalardyń qaýipsiz aımaǵyna ornalastyrý qajet, — delingen habarlamada.
Jergilikti dárigerler bul ádisti aldaǵy ýaqytta óz betinshe tájirıbede qoldanbaq. Sheberlik saǵaty aıasynda eki ota jasaldy. Mamandar eki naýqastyń da jaǵdaıy qanaǵattanarlyq ekenin, nevrologııalyq tapshylyq baıqalmaıtynyn aıtyp otyr.
Buǵan deıin biz Qyzylorda oblysynyń turǵyny hırýrgııalyq otadan keıin denesinde dáke tampony qalyp qoıǵanyn aıtyp, sotqa júgingenin jazǵan edik.
