Qyzylordada metrologııalyq buzýshylyqtar anyqtalǵan kompanııaǵa aıyppul salyndy
QYZYLORDA. KAZINFORM — Tehnıkalyq retteý jáne metrologııa komıtetiniń Qyzylorda oblysy boıynsha departamenti 2026 jyldyń alǵashqy jartysynda 80 memlekettik baqylaý, tekserý jumysyn júrgizdi.
Onyń 65-i nemese 81%-nan buzýshylyqtar anyqtaldy.
— Sonymen qatar 1 ákimshilik is qaralyp, 670 375 teńge ákimshilik aıyppul bıýdjetke óndirildi. Aqparattyq júıelerge monıtorıng qorytyndysymen «Energetık KZO» JShS-niń 35 ólshem quralynyń salystyryp tekserý sertıfıkattarynan buzýshylyq anyqtalyp, olardyń kúshi joıyldy. «Kelin shaı», «Al Haıat» shaılary, «Petropavlovskoe» ýltrapasterlengen súti kórsetkishteri boıynsha talapqa saı kelmeýine baılanysty sáıkestik deklaratsııalarynan aıyryldy. Sondaı-aq «Mozyrsol» as tuzy, «Shoco Pie» pechenesi, «Fariman» ashytqy ónimderiniń tańbalanýynda memlekettik tilde aqparat bolmaǵan. Olardyń da sáıkestik deklaratsııalarynyń kúshi joıyldy, — dedi departament basshysy Baýyrjan Qarsaqbaev.
Elektr energııasyn óndiretin «Krıstall Menedjment» AQ-ǵa qatysty metrologııalyq buzýshylyqtar anyqtalyp, ákimshilik aıyppul salyndy. Benzın, motor maıy, muzdatqysh suıyqtyǵynyń úlgilerin synaqtan ótkizgende ónimder tańbalanýy boıynsha tehnıkalyq reglament talaptaryna saı bolmaı shyqty. Nátıjesinde 2 ónim saýda aınalymynan alyndy.
Eske salaıyq, departament ótken jyly 3 ákimshilik isti qaraý nátıjesinde 1 mln 288 myń teńgege jýyq aıyppul bıýdjetke óndirgen bolatyn.
