Qyzylordada memlekettik qyzmetke úmitkerlerdiń 68% merıtokratııa qaǵıdatymen joǵary laýazymǵa taǵaıyndaldy
QYZYLORDA. KAZINFORM — Ótken jyldyń qorytyndysyna súıensek, Qyzylorda oblysyndaǵy memlekettik qyzmetshilerdiń shtat sany — 3332. Sonyń 3245-i jumys istep júr.
Memlekettik qyzmet isteri agenttiginiń oblystyq departamenti málimdegendeı, barlyq deńgeıdegi memlekettik organdarda 615 bos laýazymǵa ornalasý úshin konkýrs ótkizildi. Nátıjesinde 423 úmitker qyzmetke qabyldandy. Merıtokratııa qaǵıdatyna sáıkes mansaptyq ósý jolymen ishki konkýrstar arqyly 68%-y joǵary laýazymǵa taǵaıyndaldy.
— Elimizde memlekettik qyzmetke kirýdi barynsha jeńildetý maqsatynda «B» korpýsynyń memlekettik ákimshilik laýazymyna konkýrstyq irikteýsiz taǵaıyndalý boıynsha belgili normalar qabyldanǵany belgili. Atap aıtqanda, joǵary oqý oryndaryn memlekettik grant esebinen úzdik aıaqtaǵan túlekter dıplom alǵannan keıin bir jyl ishinde aýdandyq jáne aýyldyq deńgeıdegi ákimshilik laýazymǵa zańnamalardan eshqandaı test tapsyrmastan konkýrstan tys taǵaıyndala alady. Prezıdent janyndaǵy memlekettik basqarý akademııasynyń úzdik túlekteri úshin oqý bitirgennen keıin bir jyl ishinde elimizdiń barlyq óńirindegi (Astana qalasyn qospaǵanda) memlekettik organdardaǵy jekelegen laýazymǵa konkýrstyq irikteýsiz taǵaıyndaý múmkindikteri qarastyrylǵan. Osy jańashyldyq aıasynda 2025 jyly 2 túlek konkýrstyq irikteýsiz bos basshylyq laýazymǵa taǵaıyndaldy. Sonymen birge birinshi basshylardyń jaýapkershiligin kúsheıtý maqsatynda agenttiktiń kelisimimen konkýrstyq irikteýsiz «B» korpýsynyń joǵary laýazymyna tikeleı taǵaıyndaý múmkindigi berildi. Bul baǵytta 9 memlekettik ákimshilik qyzmetshi konkýrs ótkizilmesten bos basshylyq laýazymǵa taǵaıyndaldy, — delingen habarlamada.
Jas basqarýshylardyń óńirlik pýlyn qalyptastyrý jáne óńirlerdi damytýǵa talantty jastardy tartý maqsatynda óńirlik kadr rezervine alynǵan 25 kandıdattyń 11-i konkýrstyq irikteýsiz bos laýazymǵa taǵaıyndaldy. Taǵy bir rezervshi Prezıdent ákimshiliginiń shaqyrýymen jańa laýazymǵa ornalasty.
Eske salaıyq, elimizde 50 myńnan astam memlekettik qyzmetshi jasandy ıntellekt elementterin óz jumysynda qoldanýdy úırendi.