Qyzylordada memlekettik qyzmet kórsetý salasynda 8 myńǵa jýyq zańbuzýshylyq anyqtaldy
QYZYLORDA. KAZINFORM – Qyzylorda oblysynda memlekettik qyzmet kórsetý sapasyna júrgizilgen baqylaý nátıjesinde 7747 zańbuzýshylyq anyqtaldy. Bul týraly Memlekettik qyzmet isteri agenttiginiń Qyzylorda oblysy boıynsha departamenti habarlady.
Esepti kezeńde departament 29 baqylaý is-sharasyn ótkizgen. Onyń 9-y josparly tekserý bolsa, 15-i jeke jáne zańdy tulǵalardyń ótinishi negizinde, taǵy 5-i memlekettik organdardyń habarlamalaryna sáıkes júrgizilgen.
- Anyqtalǵan zańbuzýshylyqtardyń basym bóligi memlekettik qyzmet kórsetý tártibin saqtamaýǵa qatysty – 4582 derek. Sondaı-aq qyzmet kórsetý merzimin buzýdyń 1605, qyzmet kórsetýden negizsiz bas tartýdyń 817 jáne bas tartý merzimin buzýdyń 192 deregi tirkelgen. Tekserý qorytyndysy boıynsha zańbuzýshylyqtardy joıý jóninde 9 usynys engizilip, 21 nusqaý men usynym berilgen. Nátıjesinde 20 tapsyrma oryndaldy, 1-eýi oryndalý ústinde. Sonymen qatar 2 qyzmetker tártiptik jaýapkershilikke tartyldy, - delingen habarlamada.
Budan bólek jeke jáne zańdy tulǵalardyń ótinishi negizinde júrgizilgen tekserý barysynda 49 zańbuzýshylyq anyqtalyp, 10 qyzmetker tártiptik, 4 laýazymdy tulǵa ákimshilik jaýapkershilikke tartylǵan.
- Jalpy, memlekettik qyzmet kórsetý salasyndaǵy zańbuzýshylyqtarǵa jol bergen 18 qyzmetker tártiptik jaýapkershilikke tartyldy. Al ruqsat qujattaryn berý merzimi men tártibin buzǵany úshin 31 ákimshilik hattama toltyrylyp, jalpy somasy 2 mln 750 myń 700 teńge aıyppul tolyq óndirildi. Baqylaý sharalarynyń nátıjesinde 1608 qyzmet alýshynyń buzylǵan quqyǵy qalpyna keltirildi. Onyń 1594-i josparly tekserý, 10-y ótinishter boıynsha júrgizilgen tekserý arqyly, taǵy 4-i suraý salý tártibimen qalpyna keltirildi, - dep málimdedi vedomstvo.
Buǵan deıin Aqmola oblysy Esil aýdanynyń prokýratýrasy ınternet arqyly býkmekerlik keńselerde bás tikken eki memlekettik qyzmetshini anyqtady.
