Qyzylordada memleket menshigine ótken jer sharýalarǵa berilip jatyr
QYZYLORDA. KAZINFORM — «Jer amanaty» jobasy aıasynda Qyzylorda oblysynda sońǵy eki jylda 300 myń gektardan astam jer memleket menshigine qaıtarylǵan.
Qaıtarylǵan alqaptar mal ósirip, egin egýge yntaly adamdarǵa berilip jatyr. Sonyń biri Syrdarııa aýdany Aıdarly aýylynyń turǵyny Qojahmet Súıindikov.
Ol kásipkerlikke negizdelgen fermer qojalyǵyn júrgizý úshin 2023 jyly aýyl shetinen 320 gektar jer alǵan. 50 bas mal alyp, sol jerde baǵyp otyr. Eti men sútin aýyl halqyna ótkizedi. Alqapqa 100 túp jemis aǵashyn, 5 gektar jerge jońyshqa ekti. Qoldan kól jasap, balyq sharýashylyǵyn da damytyp otyr.
— Zeınetke shyqqan soń mal ustaǵym keldi. Aýyl irgesinde oǵan yńǵaıly jer bolmady. Jer izdep júrgende zańsyz paıdalanylǵan jer telimderi memleket menshigine qaıtarylyp jatqanyn estidim. Jigitter jer alý jolyn kórsetip, konkýrstyq negizde osy jerdi aldym. Basyna úı, qora saldym. Odan bólek jemis aǵashyn ektim, — dedi Qojahmet Súıindikov.
Oblysta jyl basynan beri zańsyz berilgen, paıdalanylmaǵan 30787 gektar jer memleket menshigine qaıtaryldy. Bıyl jalpy 60 myń gektar jerdi qaıtarý josparlanǵan.
Buǵan deıin biz Abaı oblysynda aýyl sharýashylyǵy maqsatyndaǵy jerlerdi memleket menshigine qaıtarý boıynsha jospar mejeden asyra oryndalǵanyn jazǵan edik.