Qyzylordada memleket qorǵaýyndaǵy aǵashtardy zańsyz kesken kúdiktiler ustaldy
ASTANA. KAZINFORM — Memleket qorǵaýyndaǵy aǵashtardy zańsyz kesý jáne daıyndaýmen aınalysqan qylmystyq toptyń áreketi áshkerelendi, dep habarlaıdy Polisia.kz.
26 qańtarda Qyzylorda oblysy polıtsııa departamentiniń uıymdasqan qylmysqa qarsy kúres basqarmasy oblystyq prokýratýramen birlesip júrgizgen jedel-izdestirý is-sharalarynyń nátıjesinde memleket qorǵaýyndaǵy aǵashtardy zańsyz kesý jáne daıyndaýmen aınalysqan qylmystyq toptyń joly kesildi.
Kúdiktilerdiń zańsyz áreketteri memlekettik tabıǵı qoryq aýmaǵynda júzege asyrylǵan. Atalǵan iske tabıǵı resýrstar jáne tabıǵat paıdalanýdy retteý basqarmasynyń jekelegen ınspektorlary da qatysyp, qylmystyq topqa «qamqorlyq» kórsetken. Olar júıeli túrde zańsyz aqshalaı syıaqy alyp otyrǵany anyqtaldy.
Tergeý derekterine sáıkes, kúdiktiler sırek kezdesetin sekseýil aǵashyn zańsyz daıyndap, ony shekaralas oblystarǵa ótkizý boıynsha turaqty qylmystyq shemany uıymdastyrǵan. Aǵash daıyndaý oryndary anyqtalyp, ónimdi basqa óńirlerge tasymaldaý faktileri qujattaldy.
- Tintý barysynda birneshe atys qarýy men oq-dáriler, júk kólikteri, elektrli aralaý quraldary, radıostantsııalar, iri kólemdegi aqsha qarajaty, sondaı-aq tabıǵı jaǵdaıda qalpyna kelýi ondaǵan jyldy qajet etetin zańsyz kesilgen sekseýildiń edáýir kólemi tárkilendi, delingen aqparatta.
Qazirgi ýaqytta tergeý amaldary júrgizilip jatyr. Kúdiktiler ýaqytsha ustaý ızolıatoryna qamaldy. Olarǵa 12 jylǵa deıin bas bostandyǵynan aıyrý jazasy qoldanylýy múmkin. Memleketke keltirilgen zalal kólemi anyqtalýda.
Іshki ister mınıstrligi sırek kezdesetin jáne joıylyp ketý qaýpi bar ósimdikterdi zańsyz kesý ekojúıege eleýli zııan keltiretinin jáne aýyr qylmystar sanatyna jatatynyn eskertedi.
Aıta keteıik, byltyr qarashada Qostanaı oblysynda ormandaǵy aǵashty zańsyz keskender ustaldy.