Qyzylordada Memleket basshysynyń «Ádiletti qoǵamǵa — shynshyl sóz» kitaby talqylandy
QYZYLORDA. KAZINFORM — Búgin Qyzylordada Qazaqstan Respýblıkasynyń Prezıdenti Qasym-Jomart Toqaevtyń «Ádiletti qoǵamǵa — shynshyl sóz» atty kitabyn talqylaýǵa arnalǵan óńirlik dóńgelek ústel ótti, dep habarlaıdy oblys ákiminiń baspasóz qyzmeti.
Alqaly jıyndy oblys ákiminiń orynbasary Meırambek Shermaǵanbet júrgizdi. Oǵan zııaly qaýym, memleket jáne qoǵam qaıratkerleri, ǵylymı-akademııalyq orta ókilderi, zańgerler men belsendi jastar qatysty.
Jıynda Memleket basshysynyń eńbeginde kóterilgen negizgi taqyryptar, qoǵamdyq-saıası, áleýmettik, rýhanı-adamgershilik máseleler men el damýynyń strategııalyq baǵyttary jan-jaqty talqylandy.
Memleket jáne qoǵam qaıratkeri Murat Baqtııaruly «Ádiletti Qazaqstan, Taza Qazaqstan, halyqaralyq saıasat» atty baıandamasynda elimizdegi júıeli reformalar, qoǵamdyq jaýapkershilik jáne ekologııalyq bastamalardyń ózara sabaqtastyǵyna toqtaldy.
Qorqyt ata atyndaǵy Qyzylorda ýnıversıtetiniń basqarma tóraǵasy — rektory, oblystyq qoǵamdyq keńes tóraǵasy Naýryzbaı Baıqadamov óz baıandamasynda básekege qabiletti ult qalyptastyrýdaǵy sapaly bilim, ǵylym men tıimdi memlekettik basqarýdyń mańyzyn atap ótti.
Qazaqstan Jazýshylar odaǵy oblystyq fılıalynyń tóraǵasy Qarshyǵa Esimseıitova «Tarıh, mádenıet jáne rýhanııat týraly paıymdar» taqyrybynda ulttyq qundylyqtardy saqtaý, tarıhı sanany jańǵyrtý jáne rýhanı sabaqtastyq máselelerin ortaǵa saldy.
Qazaqstan Respýblıkasy Prezıdenti janyndaǵy Memlekettik basqarý akademııasy Qyzylorda oblysy boıynsha fılıalynyń dırektory, zań ǵylymdarynyń kandıdaty Aqzada Madalıeva «Konstıtýtsııa jáne Zań men Tártip» taqyrybyndaǵy baıandamasynda quqyqtyq memleketti nyǵaıtý, zań ústemdigin qamtamasyz etý jáne azamattyq jaýapkershilikti arttyrý máselelerin saralady.
Qorqyt ata atyndaǵy Qyzylorda ýnıversıtetiniń fılosofııa doktory (PhD) Serikhan Júzeev «Jastarǵa arnalǵan oılar: bilim, eńbek, jaýapkershilik jáne bolashaq» taqyrybynda sóz sóılep, jas urpaqtyń boıynda bilimge umtylys, eńbekqorlyq, otanshyldyq jáne jaýapkershilik qundylyqtaryn qalyptastyrýdyń mańyzyn atap ótti.
Dóńgelek ústelge qatysýshylar Memleket basshysynyń eńbegindegi ádilettilik, zań ústemdigi, ashyqtyq, adal eńbek pen jaýapkershilik qaǵıdattarynyń qoǵam damýyndaǵy mańyzyn jan-jaqty talqylady.
Pikir almasý kezinde «Zań men Tártip» qaǵıdatyn qoǵamdyq sanada ornyqtyrý, ulttyq rýhanııatty damytý, bilim men ǵylymnyń bedelin arttyrý, jastardy adal eńbek pen azamattyq jaýapkershilikke baýlý boıynsha usynystar aıtyldy.
Jıyn Memleket basshysynyń eńbeginde kóterilgen bastamalar men qundylyqtardy qoǵamda keńinen nasıhattaýǵa, el bolashaǵyna qatysty ózekti máseleler tóńireginde mazmundy pikir almasýǵa múmkindik bergen mańyzdy dıalog alańyna aınaldy.
