Qyzylordada mekteptiń burynǵy bas esepshisi 36 mln teńgeni jymqyryp, qumar oıynǵa tikken

QYZYLORDA. KAZINFORM – Qyzylorda oblysynyń Jańaqorǵan aýdanynda mekteptiń bas esepshisi bolǵan Abzal Seıdekovke qatysty qylmystyq is boıynsha sot úkimi shyqty. Ol qyzmet babyn paıdalanyp, memlekettik mekeme qarjysyn qaltaǵa basqan. Bul týraly Qyzylorda oblysy boıynsha Ekonomıkalyq tergep-tekserý departamentinen habarlady.

- Tergeý barysynda anyqtalǵandaı, Abzal Seıdekov 2023 jyldyń 1 qańtary men 2024 jyldyń 31 jeltoqsany aralyǵynda ózine senip tapsyrylǵan laýazymdyq mindetti teris maqsatqa paıdalanyp, mektep qyzmetkerleriniń aılyq jalaqysyn esepteý kezinde únemdelgen qarajatty óz shotyna zańsyz aýdaryp otyrǵan. Jalpy somasy 36 mıllıon teńge kólemindegi qarajatty jymqyryp, ony «Pin Up» býkmekerlik qosymshasy arqyly qumar oıynǵa jumsaǵan. Alaıda, tergeý barysynda keltirilgen zalal tolyǵymen óteldi, 36 mıllıon teńge bıýdjetke qaıtaryldy, - delingen habarlamada.

Mekteptiń burynǵy bas esepshisi Qylmystyq kodekstiń 189-babyniń 4-bóligi 2-tarmaǵy (senip tapsyrylǵan bóten múlikti ıemdenip alý nemese ysyrap etý, asa iri mólsherde) boıynsha kináli dep tanylyp, sot úkimimen 7 jylǵa bas bostandyǵynan aıyryldy.

– Sonymen qatar 7 jyl merzimge esepshilik qyzmetpen aınalysý quqyǵynan aıyryldy. Sottalýshy jazasyn qylmystyq atqarý júıesiniń qaýipsizdigi ortasha mekemesinde óteıdi, - delingen departament habarlamasynda.

Buǵan deıin biz Qarjylyq monıtorıng agenttigi jyl basynan beri 36 qarjy pıramıdasynyń qyzmetin toqtatqanyn jazǵanbyz.