Qyzylordada mekteptiń bas esepshisi men muǵalimder asa iri mólsherde memleket qarjysyn jymqyrǵan
QYZYLORDA. KAZINFORM – Qyzylorda oblysy boıynsha ekonomıkalyq tergep-tekserý departamenti asa iri mólsherde memleket qarjysyn jymqyrý deregin anyqtap, oǵan qatysy bar adamdardyń zańsyz áreketin áshkereledi.
Tergeý nátıjesinde belgili bolǵandaı, Qarmaqshy aýdanyna qarasty Aqaı aýylyndaǵy mekteptiń bas esepshisi Aınur Eralıeva ózine senip tapsyrylǵan mektep dırektorynyń elektrondy tsıfrly qoltańbasyn paıdalana otyryp, qyzmettik ókilettigin teris paıdalanǵan.
- Mektep muǵalimderi M.Aıjigit, A.Jaryqbaeva, J.Ótepbergenova, A.Nurmuhanova, G.Baımaǵambetova, G.Jomartpen aldyn ala sóz baılasyp, bótenniń múlkin asa iri mólsherde jymqyrǵan. Onyń sybaılasy Aıbol Taýpıqov qylmysty iske asyrý kezinde kómek kórsetip, jymqyrylǵan qarjyny bólisý men jasyrýǵa járdemdesken. Sondaı-aq M.Aıjigit, A.Jaryqbaeva, J.Ótepbergenova, A.Nurmuhanova, G.Baımaǵambetova, G.Jomart sııaqty birqatar muǵalim atalǵan toptyń áreketine qatysyp, jymqyrylǵan qarajatty ózara bólisken. Tergeý derekteri boıynsha qylmystyq top 2022-2024 jyldar aralyǵynda memleketke jalpy somasy 42 mln 500 myń teńgeden astam materıaldyq zalal keltirgen, - delingen habarlamada.
Sot úkimimen Aınur Eralıeva QR Qylmystyq kodeksiniń 189-babynyń 4-bóliginiń 2-tarmaǵy boıynsha kináli dep tanylyp, 7 jyl merzimge bas bostandyǵynan aıyryldy. Alaıda, sot QK-niń 74-babynyń 1-bóligine sáıkes onyń 14 jasqa tolmaǵan balasynyń bolýyna baılanysty jazanyń oryndalýyn 5 jyl merzimge keıinge qaldyrdy.
- Sonymen qatar ol 10 jyl merzimge qarjy jáne býhgalterlik esep salasynda jumys isteý quqyǵynan aıyryldy. Jazasyn qylmystyq atqarý júıesiniń ortasha qaýipsizdik mekemesinde óteıdi. Aıbol Taýpıqovqa QK-niń 63-baby qoldanylyp, 7 jyl merzimge shartty jaza taǵaıyndaldy. Qalǵan 6 muǵalimniń árqaısysyna 2 jyldan 2 jyl 4 aıǵa deıin bas bostandyǵyn shekteý jazasy belgilendi, - delingen departament habarlamasynda.
Atalǵan is boıynsha memleketke keltirilgen zalal sottalýshylardan óndiriledi.
Eske salsaq, Qyzylorda oblysynda prokýrorlar jyl basynan beri 200 myńnan astam adamnyń quqyǵyn qorǵady.