Qyzylordada medıtsınalyq uıymdar 21 mln 784 myń teńgeden astam aıyppul óndirdi
QYZYLORDA. KAZINFORM - QR DSM Medıtsınalyq jáne farmatsevtıkalyq baqylaý komıtetiniń Qyzylorda oblysy boıynsha departamenti protsedýralyq, stomatologııalyq kabınetter men medıtsınalyq uıymdardy tekserdi.
Tekserý barysynda tegin medıtsınalyq kómektiń kepildik berilgen kólemi jáne MÁMS aıasynda halyqqa medıtsınalyq qyzmet kórsetýge arnalǵan bıýdjet qarajatyn, qor aktıvterin, stomatologııalyq kómek boıynsha BJZQ aıasynda halyqqa medıtsınalyq qyzmet kórsetýge arnalǵan bıýdjet qarajatyn paıdalaný men jumsaý zańdylyǵy eskerildi.
- Nátıjesinde 155 ákimshilik is qozǵalyp, memleket paıdasyna 21 mln 784 myń teńgeden astam aıyppul salynyp, tolyq óndirildi. Ótken jyly oblystyq polıtsııa departamentinen «Dármek» jedel profılaktıkalyq is-sharasy aıasynda 32 is materıaly túsken. Tekserý arqyly quny 2 mln 265 myń teńgege jýyq 7 ákimshilik is qozǵaldy. Qalǵan ister qujattyń jetkiliksiz bolýyna baılanysty kúshti áser etetin, esirtki, psıhotropty, prekýrsorlarǵa jatatyn dárilik zattar bolmaǵandyqtan qaıtaryldy, - dedi departament basshysy Janerke Jaqsylyq.
2024 jyldyń 1 shildesinen bastap elimizde dárilik zattardy mindetti tańbalaý engizildi. Ondaǵy maqsat – dári-dármektiń óndirýshiden patsıentke deıingi jolyn qadaǵalaý. Árbir dárilik zattyń qaptamasynda Data Matrix kody qoldanylady. Tańbalanǵany taýarlardy tańbalaý jáne qadaǵalaý aqparattyq júıesi arqyly tirkelip, qadaǵalanady.
- Aqparattyq júıeniń málimetine sáıkes Qyzylorda oblysynda 8 955 682 qaptama dárilik zat kiristelgen. 6 817 393 qaptama dárilik zat aınalymnan shyǵarylǵan. Bul - jalpy kórsetkishtiń 76,2%-y, - dedi departament basshysy.
Eske salaıyq, júıe iske qosylǵan alǵashqy aıdyń ózinde 10,2 mıllıonnan astam qaptama tańbalansa, 2024 jyldyń sońyna qaraı aı saıynǵy kólem bes esege jýyq ósip, jeltoqsan aıynda 49 mıllıon qaptamaǵa jetti.
