Qyzylordada máıittik donor máselesi kenje qalyp tur
QYZYLORDA. KAZINFORM – Qyzylorda oblysynda osyǵan deıin 95 adamǵa búırek, 12 adamǵa baýyr transplantatsııasy jasalǵan. Bul týraly oblystyq kópbeıindi aýrýhana ókilderiniń Qyzylorda joǵary medıtsınalyq kolledjiniń stýdentterimen kezdesýinde belgili boldy.
Onyń ishinde qaıtys bolǵan adamnyń organy salynǵan jaǵdaılar saýsaqpen sanarlyq. Negizgi donor —naýqastyń baýyrlary, týystary ne jaqyndary.
Aýrýhana dırektory, PhD doktor, qaýymdastyrylǵan professor, joǵary sanatty transplantolog Jasulan Baımahanov sondyqtan halyqqa máıittik donordyń mańyzyn keńinen túsindirý qajet dep esepteıdi.
- 2014 jyly Qyzylordada jas jigitke týǵan qaryndasy bir búıregin berdi. A.N.Syzǵanov atyndaǵy Ulttyq ǵylymı hırýrgııa ortalyǵynyń bilikti mamandary kelip ota jasady. Ótken jyly Qyzylorda qalasynda 6 naýqasqa týystyq donordan búırek transplantatsııasy jasaldy. 1 naýqasqa baýyr salyndy. Elimizde máıittik donordy damytý mańyzdy. Sebebi bir adamnyń máıitinen alynǵan aǵza birneshe adamdy ólimnen arashalap, ómir súrýine múmkindik syılaıdy.
Qyzylordalyq Maqpal Oralova — týystyq donordan ota jasatqandardyń biri.
- Búıregi, baýyry aýyryp, gemodıalızge qatynap júrgen jastar óte kóp. Osy oraıda zamandastarymdy energetıkalyq sýsyndardan aýlaq bolyp, salaýatty ómir saltyn ustanýǵa shaqyramyn. Adamdarǵa máıittik donor týraly kóbirek oqyp, bilip, qaıtys bolǵannan keıin de jaqsylyq isteýge bolatynyn túsindirý qajet. Sebebi kezegin kútip júrgen naýqastar kóp. Olardyń bári men sııaqty trasplantatsııa jasatyp, jańa ómir bastaǵanyn qalaımyn, - dedi Maqpal Oralova.
Qyzylorda oblysy boıynsha transplantant úılestirýshi, joǵary sanatty nefrolog Lıza Nursultanova óńirde 361 adam gemodıalız tirkeýinde turǵanyn jetkizdi. Naýqastar aýrýhanaǵa kelip tekserilip, emdelip turady.
- Barlyǵy ımmýnosýpressıvti dárilerdi ýaqytyly iship, keshiktirmeı em qabyldaıdy. Bizde kútim kezegi degen bar. Ol aı saıyn jańartylyp, qadaǵalanyp turady. Búırek boıynsha donorǵa muqtaj 144 adam kútý paraǵynda tur. Olar úshin donor tabý, máıitten aǵza alý — eń ózekti problema, - dedi maman.
Biz buǵan deıin elimizde donorlyq organdardy bir óńirden ekinshi óńirge qaýipsiz ári jyldam jetkizýge múmkindik beretin apparat ázirlenip jatqanyn jazǵanbyz.