Qyzylordada kúıeýinen qorqyp, balkonnan sekirip ketken áıel múgedek bolyp qaldy

QYZYLORDA. KAZINFORM — Qyzylorda qalasynda áıel adam azamattyq nekedegi kúıeýiniń kúsh kórsetýinen birinshi toptaǵy múgedek bolyp qaldy. Buǵan baılanysty Qyzylorda qalasynyń № 2 sotynda úkim shyǵaryldy.

Áıel adam men azamattyq nekedegi kúıeýi arasynda qyzǵanyshtan janjal týyndaǵan.

Sol sátte sottalýshy jábirlenýshini balaǵattap, oǵan birneshe márte aıaýsyz soqqy jumsaǵan. Basynan shyny bótelkemen uryp, onyń uıaly telefonyn alyp qoıǵan.

Jábirlenýshi ómirine qaýip tónip turǵanyn sezinip, qonaq bólmedegi lodjııadan sekirip ketken.

Saldarynan onyń densaýlyǵyna aýyr zııan kelip, birinshi top múgedektigi taǵaıyndalǵan.

«Sot otyrysynda sottalýshy ózine taǵylǵan aıypty moıyndaǵan joq. Sottalýshy QR Qylmystyq kodeksiniń 105-babynyń 1-bóliginde kózdelgen qylmysty jasaǵany úshin kináli dep tanyldy. Oǵan 1 jyl 6 aı bas bostandyǵynan aıyrý jazasy taǵaıyndaldy. Ol jazasyn qylmystyq-atqarý júıesiniń qaýipsizdigi barynsha tómen mekemesinde óteıdi. Sondaı-aq ol „maıor“ sheninen aıyryldy. Azamattyq talap boıynsha sottalýshydan 4 054 181 teńge materıaldyq, 5 000 000 teńge moraldyq zııan óndirildi», — dep málim etti Qyzylorda qalasynyń № 2 sotynan.

Eske salsaq, budan buryn Qyzylorda oblysynda 200 mln teńgege jýyq qarjy jymqyrǵan 9 adamǵa úkim shyqqan edi.