Qyzylordada kúrishke beriletin sý kólemi baqylaýda
QYZYLORDA. KAZINFORM — Qyzylordalyq dıqandar 70 myń gektar jerge Syr salysyn egý jumysyn maýsym aıyna deıin aıaqtaıdy.
Oblystyq aýyl sharýashylyǵy jáne jer qatynastary basqarmasynyń málimetinshe, sýdy kóp qajet etetin daqyldar kólemin ońtaılandyrý týraly Prezıdent tapsyrmasyna sáıkes bıyl kúrishtiń kólemi ótken jylǵydan 10 myń 900 gektarǵa qysqardy. Onyń ornyn sýdy az qajet etetin daqyldar, ásirese, júgeri basady.
— Búginde dıqandar erte egiletin daqyldardy egip boldy. Qazirgi kúni basqa túrlerin egip jatyr. Kúrishtiń 49 myń 502 gektary egilip, 41 myń 360 gektary sýǵa bastyryldy. Sý únemdeý tehnologııalaryn paıdalaný kólemi eki ese artyp, 16 myń 700 gektarǵa deıin jetkiziledi. Qazirgi kúni josparlanǵan kólemniń 82,2%-y oryndaldy. Egin sharýashylyǵyn ártaraptandyrý, sý únemdeý baǵytynda óńirimizde quny 122 mlrd teńgege 4 iri joba iske asyrylyp jatyr, — dedi basqarma basshysynyń orynbasary Dáýletbek Ábdirasýlov.
Magıstraldy jáne sharýashylyqaralyq kanaldarǵa sý berilýi, aýyspaly egis tártibiniń saqtalýy, egiletin kúrish kóleminiń belgilengen kólemnen aspaýy jumys toptarynyń baqylaýynda. Ol úshin Syrdarııa ózenindegi sý sharýashylyǵynyń ár kúngi ahýalyn sý mamandary qalt jibermeı qadaǵalap otyr.
— Búgingi kúni Shardara sý qoımasyndaǵy sý kólemi — 5 002 mln tekshe metr, tómenge sekýndyna tastalyp jatqan sý kólemi — 200 tekshe metr. Kóksaraı sý rettegishindegi sý kólemi — 813,63 mln tekshe metr, tómenge sekýndyna tastalyp jatqan sý kólemi — 350 tekshe metr. Shardara sý qoımasy men Kóksaraı sý rettegishinen Syrdarııa ózeniniń tómengi aǵysyna sekýndyna 550 tekshe metr sý tastalsa, Qyzylorda oblysynyń shekarasyna Kóktóbe sý beketi arqyly sekýndyna 538 tekshe metr sý kelip jatyr. Qyzylorda sý torabynan ózenniń tómengi aǵysyna sekýndyna jiberilgen sý kólemi — 122 tekshe metr. Aral teńizine sekýndyna 48 tekshe metr sý túsip jatyr. Jyl basynan beri sekýndyna túsken sý mólsheri — 780 mln tekshe metr, — dedi Aral-Syrdarııa basseındik ınspektsııasynyń basshysy Zeınýlla Qaztoǵanov.
Shardara sý qoımasy men Kóksaraı sý rettegishiniń jumys kestesi baqylaýǵa alynǵan. Jergilikti atqarýshy organdar jáne sý sharýashylyǵy uıymdary Syrdarııa ózenindegi jaǵdaıdy qadaǵalap otyr.
Eske salaıyq, Qyzylorda oblysynda qazirgi tańda 49 857 gektar jerge kúrish dáni sebilip, 41 657 gektar egistikke sý jiberildi.
