Qyzylordada kúrish jınaý naýqany tamyzdyń úshinshi onkúndiginde bastalady
QYZYLORDA. KAZINFORM – Qyzylorda oblysynda bıyl 185,8 myń gektarǵa aýyl sharýashylyǵy daqyldary egildi.
Oblystyq aýyl sharýashylyǵy jáne jer qatynastary basqarmasynyń málimetinshe, sý resýrsyn tıimdi paıdalaný úshin kúrish egisiniń kólemi ótken jylmen salystyrǵanda 10,9 myń gektarǵa qysqardy.
- Osylaısha 70,1 myń gektarǵa Syr salysy ornalastyryldy. Qysqartylǵan kúrish daqylynyń ornyna dándik júgeri egisi bıyl 5 ese ulǵaıyp, 10 myń gektarǵa egildi. Kúrish jınaý jumysyn tamyz aıynyń úshinshi onkúndiginde bastaý josparlanǵan, - dedi basqarma basshysy Talǵat Dúısebaev.
Egin sharýashylyqtarynda sý únemdeý tehnologııalaryn qoldaný aıasy keńeıip keledi. Byltyr 8 myń 100 gektar alqapta osyndaı tehnologııa qoldanylsa, bıyl onyń kólemi 14 myń 200 gektarǵa deıin artty.
Buǵan deıin Sý resýrstary jáne ırrıgatsııa mınıstri Nurjan Nurjigitov jumys saparymen Qyzylorda oblysyna baryp, óńirdegi vegetatsııa kezeńiniń ótý barysymen tanysty.
