Qyzylordada kúrish alqaptarynan 50 myń balyq shabaǵy qutqaryldy
QYZYLORDA. KAZINFORM – Qyzylorda oblysynda kúrishtik alqaptarda sýdyń tartylýyna baılanysty shabaqty qutqarý sharalary bastaldy.
Oblystyq tabıǵı resýrstar jáne tabıǵat paıdalanýdy retteý basqarmasynyń málimetinshe, sondaı jumys Jalaǵash aýdanynda atqaryldy. Jumys barysynda Shámenov aýyldyq okrýginiń kúrishtik alqaptarynan shamamen 20 myń balyq shabaǵy qutqarylyp, belgilengen tártipke sáıkes Báıbishe kóline jiberildi.
– Qazaly aýdanynyń Aqtan batyr eldi mekeni mańyndaǵy qashyrtqy kanalynan 30 myń balyq shabaǵy qutqaryldy. Onyń 10 myńǵa jýyǵy – taban, qalǵany – móńke. Balyq shabaqtarynyń bir bóligi rezervtegi Tuzdykól kóline, sondaı-aq Syrdarııa ózenine jiberildi. Bul jumysqa 8 adam jáne 2 tehnıka jumyldyryldy, – delingen habarlamada.
Bul is-shara sý bıoresýrsyn saqtaý, onyń tabıǵı popýlıatsııasyn turaqtandyrý jáne kúrishtik alqaptardy ıgerý kezeńinde balyq resýrsyna tóngen zalaldy azaıtýǵa baǵyttalǵan.
Eske sala ketsek, jýyrda Atyraýda qaldyq sýda qalǵan balyq shabaqtarynyń bir bóligi qyrylǵanyn jazdyq.
