Qyzylordada qurysh qoldy qurylysshylarǵa qurmet kórsetildi
QYZYLORDA. KAZINFORM — Búgin Qyzylorda qalasyndaǵy «Óner ortalyǵynda» Qurylysshylar kúnine arnalǵan saltanatty shara ótti.
Oǵan Parlament Senaty men Májilisiniń depýtattary Naýryzbaı Baıqadamov, Rýslan Rústemov, Murat Ergeshbaev, oblystyq quqyq qorǵaý organdarynyń birinshi basshylary, zııaly qaýym ókilderi, sala ardagerleri qatysty.
Aımaq basshysy Nurlybek Nálibaev jınalǵan qaýymdy kásibı merekemen quttyqtap, qurylys salasynda atqarylǵan jumystardy atap ótti.
— Prezıdentimiz «Biz jumysshy mamandyqtaryn dáripteý arqyly qoǵamda eńbekqor jáne naǵyz maman bolý ıdeıasyn nasıhattaımyz! Adal ári tabandy eńbegimen tabysqa jetken adamdar qashanda qurmetti, syıly bolýy kerek» degen bolatyn.
Bul — ekonomıkalyq turaqtylyq pen áleýmettik progrestiń basty faktory retinde jumysshy kásipteriniń rólin kúsheıtýdegi strategııalyq qadam.
«Jumysshy mamandyqtary jylyna» oraı jaqynda ǵana Memleket basshymyzdyń Jarlyǵymen óńirimizdiń birqatar metallýrgteri, temirjolshylary men qurylysshylary memlekettik nagradalarǵa ıe boldy. Bul eńbek adamdaryna kórsetilgen zor qurmet pen laıyqty joǵary baǵa.«Alashtyń anasy» atanǵan qasıetti Syr óńiri Prezıdentimizdiń, Úkimettiń erekshe qoldaýymen qarqyndy damýda. Oblysymyzdyń bıýdjeti 823 mlrd. teńgeden asyp, 2022 jyldan beri 226 paıyzǵa ósti. Bul qarajat aımaǵymyzdaǵy eń ózekti degen máselelerdi sheshýge, turǵyndardyń ómir súrý sapasyn jaqsartýǵa, aýqymdy ınfraqurylymdyq jobalardy iske asyrýǵa baǵyttalýda.
Bıyl 96 jobanyń qurylysyna bıýdjetten 166 mlrd 800 mln teńge qarjy bólinip, 2022 jylmen salystyrǵanda 8 esege artty. Nátıjesinde qurylys jumystarynyń kórsetkishi boıynsha respýblıkada úzdikter qatarynda kelemiz.
Qurylys salasynda qyzmet etý — bul jaı ǵana mamandyq emes, elge qyzmet etý. Qurylysy qarymdy eldiń ekonomıkasy da qýatty.
Týǵan jerimiz, Syr óńiriniń áleýmettik-ekonomıkalyq jaǵdaıynyń jaqsarýyna, sáýlettik kelbetiniń jańarýyna, zamanaýı ǵımarattardyń boı kóterýine qosqan eleýli eńbekterińiz úshin Sizderge barsha Syr jurtshylyǵynyń, jeke Ózimniń atymnan shynaıy alǵysymdy bildiremin, — dedi Nurlybek Nálibaev.
Merekelik sharada qurylys salasynyń úzdikteri «Dostyq», «Qurmet», «Eren eńbegi úshin», «Eńbek dańqy» orden-medaldarymen marapattaldy.
Sonymen qatar QR Ónerkásip jáne qurylys mınıstriniń «Qurmetti qurylysshy» tósbelgisine, «Qurmet gramotasyna» jáne Qyzylorda oblysynyń «Qurmet gramotasyna» ıe boldy.
Merekelik is-sharada ánshi Qaırat Baekenov, ánshi-kompozıtor Jarashan Tóleýbaı án shyrqady.