Qyzylordada kúrdeli aýrýlardy erte anyqtaý úshin JI platformasy engizildi
QYZYLORDA. KAZINFORM – Qyzylorda oblystyq kópbeıindi aýrýhanasynda zamanaýı sıtýatsııalyq ortalyq ashylyp, jasandy ıntellekt negizinde radıologııalyq-aqparattyq júıe jobasy iske qosyldy. Bul bastama óńirdegi densaýlyq saqtaý salasyn tsıfrlandyrýǵa baǵyttalǵan mańyzdy qadam sanalady.
Densaýlyq saqtaý mınıstrliginiń málimetinshe, joba aıasynda TMD elderinde teńdesi joq júıe qurylyp, 27 medıtsınalyq nysan biryńǵaı aqparattyq platformaǵa biriktirildi. Nátıjesinde radıologııalyq zertteýler ortalyqtandyrylyp, dıagnostıkanyń sapasy men jedeldigi aıtarlyqtaı artpaq.
Áleýmettik mańyzy bar aýrýlardy erte anyqtaý jáne olardyń aldyn alý, qaterli isikpen kúresti kúsheıtý, bıýdjet qarajatyn tıimdi paıdalaný jáne radıologııalyq qyzmetterdiń sapasyn arttyrý maqsatynda ashylǵan joba DigitalEL tizimine engizilip, Dúnıejúzilik densaýlyq saqtaý uıymy tarapynan usynylǵan. Bul ony Qazaqstandaǵy medıtsına salasyn tsıfrlandyrýdaǵy úzdik jobalardyń biri retinde aıqyndaıdy.
Atalǵan jobaǵa PAKS (PACS) júıesi engizilip, x-Eye Mammo, Toraks, Ribout Pneumonia sekildi jasandy ıntellekt sheshimderi qoldanylýda. Bul tehnologııalar medıtsınalyq keskinderdi joǵary dáldikpen taldaýǵa múmkindik beredi.
Jobaǵa oblystyq onkologııa ortalyǵy men oblystyq ftızıopýlmonologııa ortalyǵy qamtylǵan. Medıtsınalyq mekemeler zamanaýı qural-jabdyqtarmen tolyqtyryldy: 57 jumys stantsııasy men derbes kompıýter, ár dárigerge arnalǵan UPS jáne prınterler, 28 joǵary ajyratymdylyqtaǵy medıtsınalyq monıtor, sondaı-aq Agfa 15X tsıfrlandyrǵyshymen jabdyqtalǵan 7 rentgen apparaty iske qosyldy. Budan bólek, tsıfrlandyrǵysh qurylǵylarǵa 13 lıtsenzııa ornatyldy.
Jasandy ıntellektti engizýdiń nátıjesinde isikterdi 1 mm kóleminen bastap anyqtaý múmkindigi paıda boldy. Sonymen qatar, qashyqtan dıagnostıka júrgizý jolǵa qoıylyp, adamı faktor áseri 95 paıyzǵa deıin tómendedi. Bul ýaqyt pen resýrstardy tıimdi paıdalanýǵa jol ashady.
Joba sheńberinde tsıfrlyq muraǵat qalyptastyrylyp, plenkasyz tehnologııa engizildi. Nátıjesinde jylyna 300 mln. teńgege deıin únemdeý múmkindigi týyndap, zertteý sapasy artyp, klınıkalyq esep júrgizý júıesi jeńildetildi.
Sıtýatsııalyq ortalyqtyń ashylýy – óńir turǵyndaryna kórsetiletin medıtsınalyq qyzmet sapasyn jańa deńgeıge kóteretin mańyzdy qadam bolmaq.
Budan buryn habarlaǵanymyzdaı, jasandy ıntellekt Almatyda qaterli isikti erte anyqtaýǵa kómektesedi.
