Qyzylordada qurbandyq etin taratýǵa eriktiler tartylady
QYZYLORDA. KAZINFORM – Syr óńiriniń meshitteri Qurban aıt merekesine daıyndyqty bastap ketti. Mal soıý oryndaryn daıyndaý, qasapshylar men qurban shalý rásimin júzege asyratyn mamandardy oqytý, eriktiler tobyn jasaqtaý, túrli formatta is-sharalar uıymdastyrý naýqany qyzdy.
Qazaqstan musylmandary dinı basqarmasynyń Qyzylorda oblysy boıynsha ókildigi meıram kúnderi múmkindikke qaraı qaıyrymdylyq sharalaryn, din men dástúr sabaqtasqan rýhanı-mádenı sharalar, ulttyq oıyndar saıysyn ótkizip, balalarǵa aıt syıyn taratpaq.
- Qurbandyq shalý rásimi sanıtarlyq talapqa saı uıymdastyrylyp, arnaıy belgilengen oryndarda sharıǵı tártippen ótedi. Sondaı-aq https://qurban.muftyat.kz/ onlaın platformasy arqyly qurbandyq shalýǵa múmkindik qarastyrylǵan. Mal etin meshit eriktileri muqtaj otbasylarǵa jetkizedi. Qurban shalý rásimin óz úıinde ótkizip, ettiń bir bóligin muqtajdarǵa taratý maqsatynda meshitterge ákelem deýshi jandarǵa oblys boıynsha arnaıy et qabyldaý pýnkteri bekitildi, - delingen ókildik taratqan habarlamada.
Qurbandyq shalý oryndary Syrdarııadan basqa aýdandarda jáne Qyzylorda qalasynda belgilengen.
Dinı meıram kezinde asa qaýipti juqpaly aýrýlardyń, jappaı tamaqtan ýlaný jaǵdaılary men jiti ishek ınfektsııalarynyń taralý qaýpi joǵary. Sondyqtan mamandar mal soıý jáne et satý dúkenderinde sanıtarlyq talaptardy qatań saqtaýdy eskertti.
- Ol úshin mundaı oryndardyń tıisti veterınarlyq qujattary bolýy, mal soıý kezinde jınalǵan qaldyq ýaqytyly shyǵarylýy, qasapshylar arnaıy kıimmen, jeke gıgıenalyq zattarmen qamtamasyz etilýi kerek. Et saqtaýǵa arnalǵan tońazytqyshtar qarastyrylady, - dedi Qyzylorda oblysynyń sanıtarııalyq-epıdemıologııalyq baqylaý departamenti basshysynyń orynbasary Erlan Uzaqbaev.
Sharıǵat úkimi men ǵylymı zertteý jumysynyń qorytyndysyna sáıkes hıjrı jyl sanaýy boıynsha 1447 jyldyń zulhıjja aıy 18 mamyrda bastalady. Arapa kúni 26 mamyrǵa sáıkes keledi. Al 27 mamyr – Qurban aıt merekesiniń birinshi kúni. Aıt namazy osy kúni tańǵy saǵat 6-da bastalady.
Qurban shalý qurban aıt namazynan keıin bastalyp, aıttyń úshinshi kúni kún batqanǵa deıin jalǵasady.
Buǵan deıin biz Qurban aıt kúnderi Almatyda qurban shalatyn 12 arnaıy oryn bolatynyn habarlaǵanbyz.
