Qyzylordada kúnniń ysýyna baılanysty elektr energııasyn tutyný kólemi kúrt ósti
QYZYLORDA. KAZINFORM – Qyzylorda qalasynyń turǵyndary tarapynan jaryqtyń jıi óshýine baılanysty aryz-shaǵym kóbeıdi. Osyǵan oraı qala ákimi Nurjan Ahatov málimdeme jasady.
Onyń aıtýynsha, aýa temperatýrasynyń tym joǵary bolýy jaǵdaıdy kúrdelendirip jibergen.
- Qyzylorda qalasy osyǵan deıin 78-80 mVt elektr energııasyn tutynyp kelse, qazirgi kúni bul kórsetkish 120 mVt-qa deıin artty. Sońǵy kúnderi kúnniń kúrt ysýyna baılanysty keıbir elektr jelileri men qondyrǵylary qyzyp ketip, aqaý týyndady. Qyzylorda elektr taratý toraptary kompanııasynyń jumysshylary aqaýdy qalpyna keltirý ústinde. Sonymen qatar aldaǵy jylý berý maýsymyna daıyndyq retinde 100 shaqyrym elektr jelileri men 30-ǵa jýyq qosalqy stantsııa qaıtadan jańǵyrtylady. Kestege sáıkes bul jumysty túngi ýaqytta atqaryp jatyrmyz, - dedi ol.
Buǵan deıin biz elektr energııasynyń jıi sónýi onsyz da úı-jaılarda salqyndatqyshtyń kómegimen ǵana amaldap otyrǵan halyqtyń ashýyna tıe bastaǵanyn jazǵan edik.
