Qyzylordada quny 1,6 mln teńge bolatyn ota tegin jasalady

QYZYLORDA. KAZINFORM — Qyzylorda qalasynda tize jáne jambas býyndaryn almastyrý boıynsha patsıentter hırýrgııalyq aralasýdan bastap medıtsınalyq ońaltýǵa deıingi em-domdy tegin ala alady. Mundaı jaǵdaı MÁMS júıesi arqyly saqtandyrylǵan adamdar úshin qarastyrylǵan. Bul týraly áleýmettik medıtsınalyq saqtandyrý qorynyń Qyzylorda oblysy boıynsha fılıaly habarlady.

Endoprotezdeý — eń jıi jasalatyn ortopedııalyq otalardyń biri. Bul otada zaqymdalǵan býyn jasandy ımplantpen almastyrylady. Joǵary tehnologııalyq ota qor esebinen qarjylandyrylady.

— Qyzylorda qalalyq kópbeıindi aýrýhanasynda MÁMS aıasynda jyl saıyn 100-ge jýyq osyndaı ota jasalady. Bireýiniń quny — shamamen 1,6 mln teńge. Otadan keıin patsıentter statsıonarlyq ońaltýdan ótedi. Bul qyzmet túrleri MÁMS júıesi arqyly tegin, — dedi aýrýhananyń travmatolog-dárigeri Erkebulan Moldanazarov.

Buǵan deıin habarlaǵanymyzdaı, byltyr MÁMS aıasynda elimizde 1,1 trln teńgege medıtsınalyq kómek kórsetildi. Kórsetkish 2023 jylmen salystyrǵanda 12%-ǵa joǵary.