Qyzylordada kópqabatty úılerdi ystyq sýmen qamtýǵa 26 mlrd teńge bólindi
ASTANA. KAZINFORM — Qyzylordada turǵyndardyń ómir súrý sapasyn jaqsartý úshin baspanamen qamtý, ınfraqurylymdardy qaıta jańǵyrtý baǵytynda tıisti sharalar qabyldanyp jatyr. Bul týraly oblys ákimi Nurlybek Nálibaev aıtyp berdi.
— Qyzylordalyqtardyń armanyna aınalǵan oblys ortalyǵyndaǵy kópqabatty turǵyn úılerdi ystyq sýmen qamtamasyz etý máselesi oń sheshimin tapty. Bul maqsatqa 26 mlrd 200 mln teńge qarjy bólindi. 2022-2024 jyldary «Aýyl — el besigi» jobasy aıasynda 78 aýylda áleýmettik, ınjenerlik ınfraqurylymdardy damytýǵa baǵyttalǵan 31 mlrd 600 mln teńgege 343 joba júzege asyryldy, — dedi N. Nálibaev elordada Ortalyq kommýnıkatsııalar qyzmetinde.
Ákimniń aıtýynsha, bıyl 41 eldi mekende 66 jobany iske asyrýǵa 15 mlrd 155 mln teńge bólingen. Prezıdent tapsyrmasyna sáıkes, bıyl barlyq eldi meken 100 paıyz ortalyqtandyrylǵan sapaly aýyz sýmen qamtyldy.
— Aımaǵymyzda 2021 jyldyń sońynda gazdandyrý deńgeıi 67% bolatyn. 2022-2025 jyldary 65 mlrd 100 mln teńgege 77 joba júzege asyryldy. Bıyl oblysymyzda gazdandyrý kórsetkishi 83% jetti. Turǵyndardy elektr energııasymen qamtý baǵytynda 2022-2025 jyldary 24 mlrd 200 mln teńgege
71 joba júzege asty. Nátıjesinde óńirimizdegi elektr jelileriniń tozý deńgeıi 60,8% tómendedi, — dedi oblys ákimi.
Sondaı-aq Qyzylorda qalasynda «Aksa Enerdjı» túrik ınvestory 215 mlrd teńgege qýaty 240 megavatt bolatyn jańa jylý elektr ortalyǵyn saldy. Bıýdjet esebinen 15 mlrd teńgege 45 shaqyrym gaz qubyry júrgizildi. Bul — Táýelsizdik jyldaryndaǵy ınvestor qarjysyna salynǵan mańyzdy iri jobalardyń biri. Ortalyq óńirdi qajetti elektr energııasymen tolyq qamtamasyz etedi ári bir bóligin aımaqtan tys jerlerge satýǵa da múmkindik beredi.
Aıta keteıik, bıyl Qyzylorda oblysynyń bıýdjeti 851 mlrd teńgeden asty. Bıyl Qyzylordaǵa 750 mlrd teńgeden astam ınvestıtsııa tartylady.
Buǵan deıin oblys ákimi Qyzylordada ınvestorlar qandaı iri zaýyttardy ashatynyn aıtqan edi.