Qyzylordada «Konstıtýtsııa — azamattyq qoǵamdy damytýdyń quqyqtyq irgetasy» taqyrybynda oblystyq forým ótti
QYZYLORDA. KAZINFORM – Búgin «Dostyq úıinde» oblys ákimi Murat Ergeshbaev, zııaly qaýym ókilderi, óńirdegi úkimettik emes uıymdar jetekshileri, basqarma jáne departament basshylary, jastar uıymdary, azamattyq qoǵam belsendileriniń qatysýymen «Konstıtýtsııa — azamattyq qoǵamdy damytýdyń quqyqtyq irgetasy» taqyrybynda oblystyq azamattyq forým ótti.
Forýmda jańa Konstıtýtsııa aıasynda azamattyq qoǵam ınstıtýttarynyń rólin arttyrý, memleket pen qoǵam arasyndaǵy syndarly áriptestikti nyǵaıtý jáne qoǵamdyq dıalog mádenıetin damytý máseleleri talqylandy.
— Halyqty ortaq maqsatqa jumyldyryp, úkimettik emes uıymdardy qoǵamdyq mańyzy bar bastamalarǵa keńinen tartý — memlekettik basqarýdyń tıimdiligin arttyratyn ári qoǵam men bılik arasyndaǵy ózara senimdi nyǵaıtatyn ozyq tájirıbe.
Prezıdentimiz Qasym-Jomart Kemeluly halyqqa arnaǵan Joldaýynda: «Azamattyq qoǵamǵa qoldaý kórsetip, onyń áleýetin nyǵaıta túsý kerek. Sondaı-aq, asa mańyzdy jalpy memlekettik mindetterdi sheshý úshin talqylaý jumystaryna azamattyq qoǵamnyń múmkindikterin keńinen qoldaný qajet» dep atap ótken bolatyn.
Óńirimizdegi azamattyq qoǵam ınstıtýttary memlekettik bastamalardy iske asyrýǵa belsendi atsalysyp, halyqtyń múddesin qorǵaýǵa, ózekti áleýmettik máselelerdi sheshýge naqty úles qosyp keledi, — dedi Murat Nálqojauly.
Aımaqta myńǵa jýyq qoǵamdyq uıym tirkelgen, 2023-2026 jyldary memlekettik áleýmettik tapsyrys aıasynda 555 áleýmettik joba júzege asty. Oblystyq, aýdandyq ákimdikter janyndaǵy keńester men komıssııalar quramynda 200-den astam úkimettik emes uıym ókili bar.
Forýmda «Samuryq» ınnovatsııalyq ıdeıalardy damytý ortalyǵy» qoǵamdyq qorynyń dırektory Jandos Tusmaǵambetov, «Aq bosaǵa» áıelder qoǵamdyq birlestiginiń tóraǵasy Zeınar Tájıeva, «El-Araı» qoǵamdyq qorynyń tóraǵasy Ashat Baıdáýletov jáne «Jas tolqyn» eriktiler jasaǵynyń jetekshisi Ánýar Toqtamysov baıandama jasap, úkimettik emes uıymdardyń áleýetin arttyrýǵa qatysty usynystaryn ortaǵa saldy.
Sondaı-aq azamattyq qoǵamnyń damýyna eleýli úles qosqan azamattarǵa Konstıtýtsııanyń jańa redaktsııadaǵy arnaıy basylymy tabystaldy. Óńirdegi belsendi úkimettik emes uıymdardyń jetekshileri oblys ákiminiń Alǵys hatymen jáne arnaıy qarjylaı syıaqy sertıfıkatymen marapattaldy.
