Qyzylordada Kongo-Qyrym qandy bezgegin juqtyrýy múmkin 22 jaǵdaı tirkeldi

QYZYLORDA. KAZINFORM – Qyzylorda oblysynda kenege qarsy zalalsyzdandyrýdyń kúzgi maýsymy aıaqtaldy.

Oblystyq sanıtarııalyq-epıdemıologııalyq baqylaý departamentiniń málimetine súıensek, óńirde Kongo-Qyrym gemorragııalyq qyzbasynyń oshaǵy bolýy múmkin 111 eldi meken bar. 

- Ondaǵy mal qoralary, býferlik zonalar men sanıtarııalyq-qorǵanys aımaqtary dárilenip, tıimdilik kórsetkishi 100% boldy. Al 90%-dan tómen deńgeı kórsetken eldi mekenderge qaıtadan núktelik óńdeý jasalyp, talapqa sáıkestendirildi, - dedi departament basshysy Gúlmıra Syzdyqova. 

Jyl basynan beri oblysta Kongo-Qyrym gemorragııalyq qyzbasyn juqtyrýy múmkin 22 jaǵdaı tirkeldi. Onyń 12-si klınıkalyq-zerthanalyq jáne epıdemıologııalyq jolmen naqtylandy. 

- Atap aıtqanda, Qazaly, Qarmaqshy, Syrdarııa, Jańaqorǵan aýdandary men Qyzylorda qalasynda 1, Shıelide 5, Jalaǵash aýdanynda 2 jaǵdaı anyqtaldy. Naýqastarmen qarym-qatynasta bolǵandardyń barlyǵy 14 kún boıy medıtsınalyq baqylaýda boldy. Olardan eshqandaı shaǵym túsken joq. Aýrý oshaqtary epıdemıologııalyq-entomologııalyq zertteýden ótkizilip, zalalsyzdandyryldy, - dedi departament basshysy.

Jyl basynan beri kene shaqqan 1268 adam medıtsınalyq kómekke júgingen. Olar da eki apta em qabyldady. 

Aıta keteıik, Kongo-Qyrym gemorragııalyq qyzbasy — óte qaýipti juqpaly aýrý. Ol kóbinese keneler arqyly taraıdy.