Qyzylordada qysqa qajetti kómirdiń 15%-y daıyn
QYZYLORDA. KAZINFORM — Qyzylorda oblysynda 1 079 áleýmettik nysan bar. Búginde sonyń 98%-y aldaǵy jylý berý maýsymyna daıyn.
Oblystyq energetıka jáne turǵyn úı, kommýnaldyq sharýashylyq basqarmasynyń málimetinshe, óńirdiń ázirlik deńgeıi — 90%.
— Jylý berý maýsymynda kómir paıdalanatyn aýyldar áli bar. Bıyl oblysqa 111 myń tonna kómir qajet. Qatty otyndy tutynýshylarǵa kedergisiz jetkizý maqsatynda operatorlarmen kelisimshart jasaldy. Búginde kómir qorynyń 15%-y jasaqtaldy, jumys josparǵa sáıkes júrgizilip jatyr, — dedi basqarma basshysynyń orynbasary Tahır Nádirbek.
Ótken jyly Qyzylorda qalasynda boı kótergen jańa jylý stantsııasy aldaǵy jylý berý maýsymynda Qyzylorda qalasynyń soltústik bóligin jylýmen qamtamasyz etpek.
Qyzylorda jylý elektr ortalyǵynyń málimetine súıensek, óńirdegi jylý júıeleriniń 40%-y tozǵan.
— Ótken jylý maýsymy aıaqtalǵannan keıin ońtústik jylý qazandyǵy men TK-44 jylý toraby aralyǵyndaǵy magıstraldy jylý jelileri 950°S temperatýrada tekserilgen. Eshqandaı aqaý anyqtalǵan joq. Sonymen qatar qala aýmaǵyndaǵy barlyq jylý jelisi joǵary qysymdy gıdravlıkalyq synaqtan ótti. Synaq nátıjesinde jylý jelilerinde 42 aqaý anyqtalyp, tolyq joıyldy, — dedi kásiporyn dırektory Baqytjan Moldımanov.
Eske salaıyq, buǵan deıin elimizde jańa jylý maýsymyna daıyndyq jumystary qazir qarqyndy júrip jatqany týraly jazǵanbyz. 2026 jyly elektr stantsııalarynda toǵyz energoblokqa, 55 qazandyq pen 51 týrbınaǵa kúrdeli jóndeý júrgizý josparlanǵan.
