Úıde bolmasaq ta, kommýnaldyq tólem qymbat shyqty: qyzylordalyqtar shaǵymyna basqarma basshysy jaýap berdi

Esep aıyrysý, bereshek somasy men tólemniń júıede kórsetilýine baılanysty másele týyndaǵan. Áleýmettik jelide de osy mazmundaǵy shaǵymdar jarııalanyp jatyr.

Qazaly aýdanynyń turǵyny Quralaı Asaýbaeva shilde jáne tamyz aılarynda úıinde adam bolmaǵanyna qaramastan kóp soma kórsetilgen túbirtek alǵan.

— Balam eseptespeı shilde aıyna 13 myń teńge tólep jiberipti. Kaspi.kz qosymshasy arqyly búgin ALSEKO kompanııasynan taǵy tamyz aıyna 10 myń teńge tóleý týraly habarlama kelip tur. Buryn aı saıyn 3000 teńge, ári ketkende 5000 teńge tóleýshi edik. Eki aı boıy úıde eshkim bolmasa, ne úshin osynshama aqsha tóleýimiz kerek? Sony túsinbedik. Kórshiler de osy týraly aıtyp júr, — dep jazdy ol.

Shaǵymdarǵa qaraǵanda másele tek tólem somasynyń ósýinde emes. Turǵyndardy jańa júıedegi eseptiń ashyqtyǵy men túbirtektegi málimettiń durystyǵy da alańdatady. Turǵyndar jańa júıe boıynsha elektr men jylý energııasy, aýyzsý, qatty turmystyq qaldyqty shyǵarý qyzmeti úshin bir derbes shot arqyly esep aıyrysa alady.

Oblystyq energetıka jáne turǵyn úı kommýnaldyq sharýashylyq basqarmasynyń málimetinshe, bul jumysqa Qyzylorda elektr taratý toraptary kompanııasy, Qyzylorda jylý elektr ortalyǵy, Qyzylorda sý júıesi, Qyzylorda tazalyǵy kásiporyndary tartylǵan. Atalǵan mekemelermen memlekettik satyp alý týraly shart boıynsha biryńǵaı esep aıyrysý ortalyǵynyń qyzmetin ALSEKO júzege asyryp keledi. Almatylyq kompanııanyń aqparattyq júıesinde kommýnaldyq tólemniń barlyq túri bir ǵana tólem qujatyna biriktirilgen.

— Ondaǵy somanyń qalyptasýyna qatysty túrli suraqtar týyndaýy múmkin. Osy oraıda mańyzdy máseleni atap ótken jón. ALSEKO kommýnaldyq qyzmet tarıfin belgilemeıdi, tutynýshynyń tólem shottaryna óz betinshe ózgeris engizbeıdi nemese qosymsha soma qosýǵa múmkindigi joq. Eger turǵyn túbirtektegi sý, jylý nemese elektr energııasyna qatysty esepteýge kúmándansa, aldymen sol qyzmetti kórsetetin mekemege júginýi qajet, — dedi basqarma basshysy Medet Ýsaın.

Bul tájirıbe Qyzylorda oblysynda ǵana emes, elimizdiń barlyq óńirinde kezeń-kezeńimen júzege asyrylyp jatyr. Maqsat — kommýnaldyq tólem júrgizý tártibin jeńildetý, esepteýdiń ashyqtyǵyn qamtamasyz etý, kommýnaldyq qyzmet jónindegi barlyq aqparatty bir qujatqa biriktirý.

— «Nege dál osy ALSEKO tańdaldy»? degen suraq týyndaıdy. Qyzmet kórsetýshi mekemeler arasynda memlekettik satyp alý aıasynda baǵaǵa sáıkes qaısysy jeńiske jetedi, sol qyzmet kórsetedi. Bul kompanııa da osy júıe arqyly tańdalǵan. Al jaryq baǵasynyń tym joǵary ekenine aıtarym, elektr energııasyn tutyný kólemi jaz aılarynda artady. Óıtkeni turǵyndar tońazytqysh pen jeldetkishti ádettegiden kóp paıdalanady. Halyq «nege kún sýyǵanda, ıaǵnı qyrkúıek aıynda da kóp soma tóleımiz?» dep suraıdy. Bul — tamyz aıynda paıdalanylǵan elektr energııasynyń kórsetkishi. Shot ár aıdyń 25-inen 31-ine deıingi aralyqta esepteledi. Abonentterdiń shot kórsetkishin bir kúnde alý múmkin emes, — dedi Medet Ýsaın.

Mamandar tólem somasynda túsinispeýshilik týyndaǵan jaǵdaıda turǵyndardy eseptegishtiń naqty kórsetkishin tekserip, máseleni qyzmet kórsetýshi mekemege júginip, naqtylaýǵa shaqyrdy.

Tutynýshylar biryńǵaı tólem qujatyn, tólem tarıhyn jáne kommýnaldyq qyzmet kórsetýshilerdiń baılanys deregin «Smart JKH» mobıldi jáne veb-qosymshasy arqyly tegin bile alady.

— Tólem qujattaryn aı ishinde qaıta jańartý, kommýnaldyq qyzmet boıynsha tikeleı tólemdi biryńǵaı tólem qujatyna kezeń-kezeńimen kóshirý jáne tutynýshylardyń mekenjaı derekterin birizdendirý qajet. Bul máseleler boıynsha barlyq qyzmet kórsetýshimen birge jumys júrgizip jatyrmyz. Negizgi maqsatymyz — tutynýshyǵa birneshe jerden tólem izdep, ár qyzmet boıynsha bólek esep júrgizbeı, barlyq kommýnaldyq qyzmetti bir qujattan kórýge jáne tóleýge múmkindik berý, — dedi ALSEKO AQ kommertsııalyq dırektory Alekseı Bozjanov.

Eske salaıyq, shilde aıynda Qyzylorda qalasynda elektr jelileri men qosalqy stantsııalaryna shamadan tys kúsh tústi. Qalypty jaǵdaıda qajettilik 92 MVt bolsa, aptap ystyqta bul kórsetkish 32%-ǵa artty.