Qyzylordada kommýnaldyq máselelerge qatysty aı saıyn 15 myńnan astam ótinish túsedi

QYZYLORDA. KAZINFORM – Qyzylorda oblysynda 2020 jyldan beri kommýnaldyq máseleler boıynsha halyqtyń talap-tilegin qabyldaıtyn 109 nómirli biryńǵaı baılanys ortalyǵy jumys istep tur.

Baılanys ortalyǵynyń 30-ǵa tarta qyzmetkeri demalyssyz kúni-túni jumys isteıdi. 

- Ótken jyly turǵyndardan 182 941 habarlama tústi. Onyń 182 579-y nemesi 99,8%-y oryndaldy. Qalǵany boıynsha jumys istep jatyrmyz. Ótinishterdiń túgelge jýyǵy nemese 99,2%-y telefon arqyly túsken bolsa, 0,8%-y ǵana áleýmettik jelilerde kórinis tapqan, - dedi oblys ákimi apparaty «Jedel áreket etý ortalyǵy» KMM dırektory Baǵlan Terlikbaev. 

Ótinish ıeleriniń deni, 110 myńǵa jýyq adam qandaı da bir aqparattyń anyq-qanyǵyn surasa, ótinishterdiń endigi basym bóligi oqys oqıǵany habarlaý, keńes berý sıpatynda. 

Statıstıka jedel áreket etý ortalyǵy aıyna orta eseppen 15 myńnan astam ótinishti qabyldap, tirkegenin kórsetti. 

- Qyzmetimizdiń taǵy bir baǵyty - 112 nómirli biryńǵaı kezekshilik-dıspetcherlik qyzmet. Onda Qyzylorda qalasy boıynsha shuǵyl qyzmetterge kelip túsetin qońyraýlar qabyldanady, tirkelip, jaýapty qyzmetterge joldanady. Ótken jyly 112 nómirine 210 462 habarlam tústi. Onyń 1235-i órt sóndirý, 1287-si tótenshe jaǵdaılar, 2330-y jedel járdem qyzmetterin qamtydy. 78148-i quqyq qorǵaý sıpatynda, basqa da habarlamalar sany 127,5 myńǵa jýyq. Táýligine qabyldanatyn, tirkeletin ótinishter sany — ortasha eseppen 576, olardyń oryndalý kórsetkishi— 100%, - dedi ortalyq basshysy.

Buǵan deıin Qazaqstanda kommýnaldyq sektorǵa qatysty jańa platforma iske qosyldy.