Qyzylordada kolonııadaǵy tanysyna áıel adam súıek maıyna esirtki jasyryp ótkizbekshi boldy
QYZYLORDA. KAZINFORM — Qyzylordada kolonııaǵa áıel adam súıek maıyna jasyrylǵan esirtki zattaryn ótkizbekshi bolǵany anyqtaldy.
Qyzylorda oblysy boıynsha QAJD-ǵa qarasty № 60 (qaýipsizdigi aralas) mekemesinde qaraqshylyq úshin jazasyn ótep jatqan sottalǵan azamatqa áıel adam esirtkini súıekke jasyryp ótkizýge tyrysqan. Azyq-túlik salynǵan sómkeni arnaıy qurylǵy arqyly tekserý barysynda zattardyń kúmándi túsi baıqalǵan.
Tekserý tobynyń qyzmetkerleri súıektiń ishinen túıinshekterdi tapqan. Jedel-tergeý toby shaqyrylyp, tabylǵan zat saraptamaǵa jiberildi. Sot-medıtsınalyq saraptama qorytyndysyna sáıkes, tárkilengen zattyń salmaǵy 129,9 gramm keptirilgen marıhýana bolyp shyqty.
«Sottalǵandar jáne olardyń týystaryna eskertý men túsindirme júrgizildi. Soǵan qaramastan, kolonııaǵa tyıym salynǵan zattardy jetkizýge áreket etý tirkeledi. Atalǵan jaǵdaı boıynsha QR Qylmystyq kodeksiniń 296-baby (Esirtki, psıhotroptyq zattardy, olardyń analogtaryn ótkizý maqsatynsyz zańsyz saqtaý) boıynsha sotqa deıingi tergep- tekserý jumystary júrgizilip jatyr. Bul bap boıynsha 7 jylǵa deıin bas bostandyǵynan aıyrý jazasy qarastyrylǵan», — dep málim etti Qyzylorda oblysy boıynsha Qylmystyq atqarý júıesi departamenti bastyǵynyń orynbasary Jánibek Zııabekov.
Aıta ketý kerek, sálemdeme jiberilgen sottalǵan adam qaraqshylyq úshin jazasyn ótep jatyr.
Eske salsaq, budan buryn Qyzylorda oblysynda óz mindetin oryndamaǵan josyqsyz uıymdardan 40 mln teńge óndirildi.
