Qyzylordada kólik jyldamdyǵyn baqylaıtyn «kózge kórinbeıtin» kameralar paıda boldy

QYZYLORDA. KAZINFORM — Qyzylordada jyldamdyqty baqylaýǵa arnalǵan «kózge kórinbeıtin» kameralardyń paıda bolǵany týraly aqparatty oblystyq polıtsııa departamenti rastady. 

Atalǵan vedomstvodan habarlaǵandaı, departament ıeligindegi arnaıy belgileri joq qyzmettik avtokólikterge jyldamdyqty avtomatty túrde anyqtaıtyn «Ekin X-Spotter» atty qurylǵylar ornatyldy.

— Oblys ortalyǵynda jol kólik oqıǵalarynyń aldyn alý jáne jol júrisine talapty kúsheıtý maqsatynda quqyq buzýdy tirkeıtin mobıldi avtomattandyrylǵan keshenderdi paıdalana otyryp, jasyryn patrýldeý tájirıbesi qoldanysqa engizildi. Mundaı keshenderdi qoldaný halyqaralyq tájirıbege saı keledi. Jasyryn patrýldeý birneshe memlekette keńinen qoldanylyp, jol ústindegi quqyq buzýdyń aldyn alý baǵytynda tıimdi qural retinde dáleldendi, — dedi departamenttiń jergilikti polıtsııa qyzmeti basqarmasy bastyǵynyń orynbasary, polıtsııa podpolkovnıgi Muratbek Manatov.

Tártip saqshylary osy oraıda kólik júrgizýshilerinen jyldamdyqty asyrmaýdy, tártipke baǵynýdy suraıdy.

Buǵan deıin biz óńirde jyl basynan beri mopedterge qatysty 12 jol-kólik oqıǵasy tirkelgenin, onyń basym bóligi jol qozǵalysy kezindegi talapty saqtamaǵannan, jolda júrý erejesin buzǵannan ekenin jazǵanbyz.