Qyzylordada qoǵamdyq tamaqtaný oryndaryna 4,5 mln teńgege jýyq aıyppul salyndy
QYZYLORDA. KAZINFORM — Qyzylorda oblysynda 2 myńnan astam taǵam nysany bar, onyń 600-ge jýyǵy — qoǵamdyq tamaqtaný oryndary.
Oblystyq sanıtarııalyq-epıdemıologııalyq qadaǵalaý basqarmasynyń málimetinshe, jyl basynan beri epıdemııalyq mańyzdylyǵy joǵary 32 nysanǵa halyqtyń sanıtarııalyq-epıdemıologııalyq salamattylyǵy salasyndaǵy normatıvtik quqyqtyq aktilerge sáıkes keletini jóninde qorytyndy berilgen. Bıyl 9 aıda «E-lıtsenzııalaý» baǵdarlarmasy arqyly eleýsiz nysandardyń qyzmet kórsete bastaǵany týraly 71 nysannan habarlama túsken. Onyń basym kópshiligi Qyzylorda qalasy men Qazaly aýdanynyń úlesinde.
— Barlyq qoǵamdyq tamaqtaný orny sanıtarııalyq-epıdemıologııalyq talaptardy birdeı saqtaı bermeıdi. Osy baǵytta jyl basynan beri 84 aryz tirkeldi. Onyń kóbi sanıtarııalyq tazalyqtyń saqtalmaýy, ónimderdiń jaramdylyq merziminiń ótip ketýi sııaqty mazmunda. Dálelin tapqan aryz-shaǵymdar boıynsha jeke jáne zańdy tulǵalarǵa 4,5 mln teńgege jýyq aıyppul salyndy. Zańbuzýshylyqtardy joıý týraly 25 uıǵarym berildi, — dedi departament basshysy Gúlmıra Syzdyqova.
Qoǵamdyq tamaqtandyrý oryndarynyń, eń aldymen, sanıtarııalyq-epıdemıologııalyq qorytyndysy bolýy kerek. Qyzmetkerlerdiń medıtsınalyq tekserýden ótýi, jumysqa ruqsatynyń bolýy, jeke bas gıgıenasyn jáne as blogynda tazalyqty saqtaýy, azyq-túlik qaýipsizdigin rastaıtyn qujattardyń bolýy, tez buzylatyn ónimderdi tońazytqyshta saqtaý asa mańyzdy.
— Aýrý tasymaldaıtyn mıkroaǵzalar azyq-túlik arqyly tez taralady. Sondyqtan meıramhana, kafe, ashanalardyń kez kelgen qyzmetkeri kelýshilerge zııanyn tıgizbes úshin sanıtarııalyq-epıdemıologııalyq talaptardy qatań oryndaýy tıis, — dedi departament basshysy.
Qazaqstanda 2026 jyldyń aqpan aıynan bastap balalar uıymdarynda sanıtarııalyq baqylaý tártibi ózgeredi.